“Arrestimi”, Edi Rama mbron Ballukun në Parlament, PD me popullin në protestë!

Dhënia e autorizimit nga Parlamenti për arrestimin e deputetes Belinda Balluku, tashmë e ka bërë të qartë Edi Rama ende pa filluar seanca plenare se nuk do të ndodhë, përkundër shkeljeve ligjore dhe dëshmive që ka sjellë SPAK, ndërkohë Partia Demokratike ka vendosur të organizoj një Protestë Kombëtare para Parlamentit me fillim në orën 10:00.

“Balluku e mbylli kilometrin e fundit. Tani është radha e Ramës,” ishte thirrja e Partisë Demokratike drejtuar protestuesve ndërsa Raporti i tyre i autorizimit për arrestimin e Belinda Ballukut është bërë publik në fillim të javës, ku shprehet qartë për miratimin e kërkesës së SPAK-ut një orë e më parë.

Në prag të seancës plenare Kryetari i Partisë Demokratike, Sali Berisha, tha se dorëheqja e Edi Ramës është zgjidhja e vetme, ai është njeriu më i poshtëruar sot në Europë dhe më gjerë.

“Qytetarët kërkojnë dorëheqjen e Edi Ramës si zgjidhjen e vetme të kësaj gjendje dhe të kësaj situate dramatike që përjeton vendi.
Në një kohë kur Edi Rama, njeriu më i poshtëruar në detyrë sot, në të gjithë hapësirën e Bashkimit Europian dhe më gjerë, nuk ka sot një kryemnistër të poshtëruar para botës dhe popullit të tij siç është Edi Rama.
Është i poshtëruar sepse po shkelmon ligjet dhe Kushtetutën për të mbrojtur vjedhjet e tij.
Është i poshtëruar sepse për interesa të hajdutërisë së tij, pasurive të tij të paligjshme, po mbyll dyert e BE për Shqipërinë.
Është i poshtëruar se aty ky miraton ligje në parlament për firmën e tij, firmën ia merr Pëllumbesha Spirogjoka.
Është i poshtëruar se aty ku bën ligje që Linda e tij të jetë First Lady e Shqipërisë, zonja Begaj ia menderos ligjin.
Pra, Edi Rama përjeton periudhën e poshtërimit më maksimal të një qeveritari, të një kryeministri.
Ne sot jemi këtu për të shprehur mendimin e qytetarëve shqiptarëve.
Do të votojmë në unison për heqjen e mandatit dhe arrestimin e Lubi Ballukut, por këto nuk janë zgjidhja e krizës është largimi i njeriut më të poshtëruar sot në skenën politike evropiane dhe perëndimore që quhet Edi Rama.
Ju duhet ta dini këtë, që ai është njeriu i poshtëruar për aktet që ka kryer. Por ai, për të shpëtuar lëkurën e tij, është i gatshëm të pranojë çdo lloj poshtërimi që i bëhet,” tha Sali Berisha duke përfunduar:
“Nuk mund ta imagjinoni ju se si në darkat e tij të neveritshme, që ua nxjerr ato që hanë miqve, shkon dhe u përkulet, u bie në gjunjë si legen, për t’u kërkuar që të ndryshojnë mendimin. Ta dinë shqiptarët se ky është sot Edi Rama.”

Ndërsa deputetëve socialist u është kërkuar të vijnë më herët në seancën plenare e cila fillon në orën 10:00, me qëllim që të mos bllokohen nga protestuesit; Dhe, mëngjesin e sotëm, që në orën 08:00 disa deputetë socialistë janë parë të hyjnë në Kuvend pasi do të mbahet mbledhje grupi.

Ndërkohë mësohet se Edi Rama ka vënë në dispozicion 1500 efektivë policie që vazhdojnë me dhunën shtetërore ashtu si në të gjitha Protestat që së fundi ka organizuar opozita dhe kërkon arrestimin e Belinda Ballukut.

Policia ka njoftuar një ditë më parë edhe planin e masave për Protestën që pritet të nisë në orën 10:00, ku nga ora 06:00 deri në përfundim të tubimit, do të kufizohet qarkullimi i automjeteve në rrugën “George W. Bush”.

Po ashtu, policia bën të ditur se, në varësi të zhvillimit të tubimit, mund të ketë kufizime të përkohshme edhe në akse të tjera, ndërsa trafiku do të devijohet në rrugë alternative për të lehtësuar lëvizjen e qytetarëve.

Ndryshe, seanca e sotme plenare ka këtë Rend të Ditës:

SEANCË PLENARE PUBLIKE
E enjte, 12 mars 2026, ora 10:00
RENDI I DITËS
Në mbështetje të urdhrit nr. 17, datë 10.3.2026 të Kryetarit të Kuvendit, z. Niko Peleshi, rendi i ditës është si më poshtë vijon:

1. Miratimi i procesverbalit të seancës plenare të datës 5.3.2026.

2. Njoftime.

3. Projektvendimi “Për dhënien e autorizimit nga Kuvendi për arrestimin/heqjen e lirisë së deputetes Belinda Balluku, nëpërmjet zëvendësimit të masës së sigurimit”.

(Në mbështetje të nenit 73 të Kushtetutës dhe neneve 13 dhe 118 të Rregullores së Kuvendit, shumicë e thjeshtë votash për miratim)

4. Projektligji “Për aderimin e Republikës së Shqipërisë në Konventën e Metrit, nënshkruar në Paris, më 20 maj 1875, të ndryshuar me konventën e nënshkruar në Sèvres, më 6 tetor 1921, dhe rregulloren përkatëse”.

(Në mbështetje të neneve 78, 83, pika 1, dhe 121, pika 1, shkronja “ç”, të Kushtetutës, dhe neneve 55, 73-77 të Rregullores, shumicë absolute votash për miratim)

5. Projektligji “Për ratifikimin e marrëveshjes së huas, ndërmjet Republikës së Shqipërisë (huamarrësi), përfaqësuar nga Ministria e Financave, dhe Korporatës Elektroenergjetike Shqiptare (KESH) (agjencia e zbatimit të projektit) dhe KfW, Frankfurt am Main (KfW), për rehabilitimin e hidrocentralit të Fierzës”.

(Në mbështetje të neneve 78, 83, pika 1, dhe 121, pika 1, shkronja “ç”, të Kushtetutës, dhe neneve 55, 73-77 të Rregullores, shumicë absolute votash për miratim)

6. Projektvendimi “Për disa shtesa në vendimin nr. 64/2025, “Për caktimin e anëtarësisë së komisioneve të përhershme të Kuvendit”, i ndryshuar”.

(Në mbështetje të nenit 78, pika 1, të Kushtetutës, si dhe të neneve 21, pika 1, dhe 55 të Rregullores së Kuvendit, shumicë e thjeshtë votash për miratim)

7. Projektvendimi “Për një shtesë në vendimin nr. 65/2025, “Për caktimin e anëtarëve zëvendësues në përbërjen e komisioneve të përhershme të Kuvendit”, i ndryshuar”.

(Në mbështetje të nenit 78 të Kushtetutës, si dhe neneve 21/1 dhe 55 të Rregullores së Kuvendit, shumicë e thjeshtë votash për miratim)

8. Diskutime për çështje jashtë rendit të ditës.

(Në mbështetje të nenit 45 të Rregullores së Kuvendit: Çdo deputet mund të flasë jo më shumë se 5 minuta dhe nëse diskuton në emër të grupit parlamentar, jo më shumë se 8 minuta. Koha e diskutimeve për çështje jashtë rendit ten ditës nuk mund të jetë më shumë se 60 minuta.)