Arrestimi i Babales/ Reagimi, Basha: Ja pse Edi Ramës i duhej prokuroria…
Kush është ai që priste diçka tjetër nga prokuroria Rama-Marku-Xhafa-Prela është vetëm naiv. Kështu reagon kryetari i Partisë Demokratike, Lulzim Basha pas zyrtarizimit të arrestimit të Albert Veliut i njohur si Babalja nga Prokuroria e Krimeve të Rënda si dhe masës “detyrim për t’u paraqitur në policinë gjyqësore” për gazetarin Jetmir Olldashi, duke shtuar se tani nuk ka mbetur rrugë tjetër për të vënë banditët para përgjegjësisë përveç rrëzimit me çdo mjet të mafias në pushtet.
“Kush priste diçka tjetër nga prokuroria Rama-Marku-Xhafa- Prela është vetëm naiv. Agron Xhafaj që i fshihej prej 5 vitesh drejtësisë me ndihmën e vëllait, u largua me urgjencë drejt Italisë, që të mos përballej me hetimin dhe akuzat që prokuroria e kapur i quan sot montim.”
“Sot çdo shqiptar e kupton më qartë se kurrë pse Edi Ramës i duhej prokuroria nën komandën e tij. Me aktin e sotëm Rama i ka vënë zjarrin shtetit ligjor,” vlerëson kryetari i PD, duke përfunduar:
“Tani nuk ka mbetur rrugë tjetër për të vënë banditët para përgjegjësisë përveç rrëzimit me çdo mjet të mafias në pushtet.”
Ndryshe, sot Prokuroria e Krimeve të Rënda ka zyrtarizuar masën “arrest në burg” për shtetasin Albert Veliu, si i dyshuar për kryerjen e veprat penale të “Kallëzimit të rremë” dhe “Kalimit të paligjshëm të kufirit”; Masën “arrest në burg” për shtetasin Fredi Alizoti, të cilin prokuroria e quan imitues të zërit të Agron Xhafajt, si i dyshuar për kryerjen e veprës penale të “Kallëzimit të rremë, në bashkëpunim”; Dhe, masën e sigurimit “detyrim për t’u paraqitur në policinë gjyqësore” për gazetarin Jetmir Olldashi.
