“Arrestimi i Dakos”/ Urdhër deputetëve, Edi Rama: Mos reagoni…

Pas paralajmërimit të kryetarit të Partisë Demokratike, Lulzim Basha, se po përgatitet arrestimi i Vangjush Dakos, kryeministri Edi Rama nuk është përgjigjur si zakonisht me shpejtësinë e rrufesë dhe me fyerje të përdala, madje ka urdhëruar edhe deputetët rilindas që të mos reagojnë.

Përmes një SMS Edi Rama përcakton edhe sjelljen e deputetëve të mazhorancës si duhet të veprojnë në ditët në vijim ndersa vazhdon ta luaj të pashqetësuarin edhe pas dorëzimit të mandateve nga ana e Opozitës:

“Në vijim të komunikimit për refuzimin e daljeve me kolegët tanë të arratisur, në debate shterpë të cilat përveçse harxhojnë kot kohën e publikut, derdhin baltë e helm në tryezat e shqiptarëve, më duhet të shtoj se nuk do të replikojmë më në distancë me deklarata e përgënjeshtrime ndaj akuzave e shpifjeve të tyre të pafundme.
E gjithë vëmendja jonë do të jetë tek njerëzit e zakonshëm pa dallim dhe komunikimi ynë do të jetë për ta e me ta. Natyrisht nuk do t’i kursejmë as arratiakët në komunikimet tona, por vetëm kur kjo i duhet komunikimit me qytetarët.

Le të merren kadrinjtë e kazanët me dokrrat e dëshpërimit të tyre dhe le të vlojnë së bashku në zjarrin e mandateve të tradhtuara! Koka bën koka pëson, megjithëse në rastin e tyre koka e bën dhe trupi si gjithnjë e pëson,” thekson Edi Rama në SMS dërguar deputetëve të mazhorancës. Ndryshe, pas takimit me krerët e degëve të PD së Tiranës, kryetari i Partisë Demokratike, Lulzim Basha, paralajmëroi se orët e fundit janë intensifikuar informacionet se po përgatitet arrestimi i Vangjush Dakos.