Arrestimi i Hashim Thaçit, Berisha: U realizua nga trinomi Putin- Vuçiç – Rama!

Në çdo variant del thjesht një argat dhe vasal i Aleksandar Vuçiçit, ishte ky vlerësimi i Kryetarit të Partisë Demokratike, Sali Berisha, pas lumit me akuza që hodhi kundër PD dhe kryetarit të saj “patrioti” Edi Rama, duke zbuluar se kush qëndron dhe prapa arrestimit të Hashim Thaçit.

Dhe jo vetëm kaq! Në debatin mbi Rezolutën “Mbi pabazueshmërinë e pretendimeve për trafikimin e paligjshëm të organeve njerëzore në Kosovë dhe Shqipëri”, Ish-Presidenti Sali Berisha tha se deri te takimi i Presidentit të Rusisë, Vladimir Putin dhe atij të Kosovës, Hashim Thaçit erdhi pas sugjerimit të Edi Ramës.

“Kur djemtë e Kosovës derdhnin gjak, kur Adem Jashari shndërroi Prekazin në Krujë të vërtetë, Rama shiste ikona të vjedhura dhe spiunonte emigrantë në Paris. Këtë e ka thënë Fatos Nano. Është deklaratë e Fatos Nanos. Për sa i përket arrestimit të Hashim Thacit duhet tu them të vërtetën: në procesin e arrestimit të tij qëndron një trinom Kremlin- Beograd- Tiranë. Ky e mori e futi Thacin në spirtalet e ndryshimit të kufijve në Ballkan, i sugjeroi Thaçit të shtrëngonte duart me Putinin.

Ky me Ymerët dhe Klosët e tij janë burime shpifjesh të pafundme. Rama futi udhëheqjen e politikës së Kosovës në një spirale që ndikoi në procesin e arrestimit të tyre. Unë do diskutoj më vonë për të gjitha të vërtetat e hetimeve dhe raportit të Dick Marty. Ky që do të bëhet tani patriot, me Baton Haxhiun janë dy promotorët e arrestimit të udhëheqjes politike të Kosovës. Këta ndërmorën fushatën e asgjësimit të gjykatës ndërkombëtare që tregonte indirekt se po përpiqen të fshehin fajësitë që nuk ekzistonin,” tha Kryetari i PD, Sali Berisha duke përfunduar:

“E di që në çdo variant del thjesht një argat dhe vasal i Aleksandar Vuçic. Sepse e di që në çdo samit është i damkosur si argat i tij, jo për Kosovën, përkundrazi për planet e Vuçiç, përpiqet në çdo samit t’i bëj retushin. Këto janë një aspekt. Aspekti tjetër është 7 korriku. Kurrë s’e keni parë në këtë platformë të shpërfytyruar siç ndodhi kësaj here. Qëndrimi ynë është pa diskutim ai që ka qenë gjithmonë. Unë e kam shprehur dhe do ta shpreh jo këtu, në OKB, në PE, në Këshillin e Europës.”