Arrestimi i Ish-deputetit/ Mesazh Ramës, Basha: Nuk trembemi nga kufoma politike. Fundi…
Pas denoncimit që Ish-Deputeti i arrestuar i PD, Klevis Balliu, bëri për dhunën e ushtruar ndaj tij nga policët në Komisariatin Nr.6 ku dhe u shoqërua, Kryetari i Partisë Demokratike, Lulzim Basha, nga Korça tha se Balliu është arrestuar me urdhër politik të Edi Ramës por si ai ashtu edhe opozita në tërësi nuk i tremben Kryeministrit. Për veprimet kriminale të Edi Ramës, lideri i opozitës kishte dhe një mesazh:
“Dua t’ju përcjell sot nga kjo sallë përshëndetjet e deputetit Klevis Balliut, i cili mbahet sot në arrest politik me urdhër të drejtpërdrejt të Edi Ramës dhe zagarëve të tij politikë, Sandër Lleshaj, Ardi Veliu dhe kriminelit në krye të policisë së Tiranës. Mbahet në burg me urdhra të drejtpërdrejt politikë ndaj prokurorëve të kapur e të nënshtruar,” tha Lulzim Basha duke shtuar:
“Mbahet për të vetmin faj se kur me urdhër të banditëve iu vërsulën nënave dhe baballarëve që po mbronin shtëpitë e tyre, i spërkatën me gazin djegës dhe lotsjellës, Klevis Balliu ndodhej në krahun e qytetarëve për t’i mbrojtur nga dhuna. Ky është krimi i vetëm i Balliut, se është në krahun e qytetar.”
Duke arrestuar përfaqësuesit e opozitës, tha Kryetari i PD, Edi Rama luan të fortin dhe ka një mesazh:
“Mesazhi që do të përcjellë Rama është se unë nuk pyes, arrestoj edhe përfaqësuesit politikë të opozitës, edhe deputetë, i çoj në prokurori ata që denoncojnë, siç bëri Ervin Salianji. Mesazhi që Rama çon është se ai është pushteti, shteti dhe kur do ja merr frymën qytetarit, studentit, familjes dhe mbi të gjitha godet me padrejtësinë e drejtësisë së kapur edhe opozitën politike, që është bastioni i fundit i qëndresës kundër.”
Por, në fund edhe opozita dhe lideri i saj Lulzim Basha kanë një mesazh për kryeministrin Edi Rama:
“Më lejoni t’ju them se Klevis Balliu s’ka qenë kurrë më i vendosur dhe nuk ka qeli burgu që ta trembë, edhe ne bashkëluftëtarët e tij nuk trembemi nga një kufomë politike që i ka orët e numëruara. Fundi i organizatës kriminale të Rilindjes që solli kaq shumë dëme për 6 vite po afron dhe ne jemi më të vendosur se kurrë për ta çuar betejën tonë drejt fitores”
Ndryshe, Kryetar i PD, Lulzim Basha, pas Shkodrës dhe Vaut të Dejes ka vazhduar turin e tij nëpër Shqipëri, ku pasditen e sotme, në qytetin e Korçës zhvilloi takime me strukturat e PD, të rinjtë dhe qytetarët në prag të Protestës së Madhe të 11 Majit.
