Arrestimi i Kryetarit Bashkisë Lushnjë, Rama: Nuk do ketë asnjë mbrojtje nga PS
Pas operacionit të SPAK që çoi në arrestimin e Kryetarit të Bashkisë Lushnjë, Fatos Tushe, dhe 10 zyrtarëve të tjerë ka reaguar Kryeministri Edi Rama duke theksuar se nuk do të ketë asnjë mbrojtje nga Partia Socialiste sepse PS u shërben zgjedhësve e jo të zgjedhurve. Dhe, si çdo herë duke e tepruar edhe sot ndërsa foli për moralin e Partisë Socialiste, zhvlerësoi aksionin e SPAK i cili nuk është e qartë se pse nuk e filloi luftën kundër korrupsionit nga Tirana por nga Lushnja!
“Kryetari i Bashkisë së Lushnjës dhe cilido tjetër i akuzuar nga drejtësia në këtë rast apo në çdo rast, nuk do të ketë asnjë mbrojtje nga Partia Socialiste e duhet të përgjigjen vetë para drejtësisë, me avokatët e tyre e me gojën e tyre! PS u shërben zgjedhësve jo të zgjedhurve,” thekson Edi Rama i cili ndonëse qeverisë me mazhorancën më të përfolur për abuzim dhe korrupsion ai vazhdon dhe shet ndershmëri:
“Çdo zgjedhës duhet ta dijë se besnikëria jonë ndaj tij nuk varet nga asnjë individ, po është flamur beteje i PS për ta bërë Shqipërinë të ardhmen tonë dhe çdo i zgjedhur nuk duhet ta harrojë se flamuri i PS s’mund të bëhet mbulesa e askujt, për asnjë interes apo faj vetjak.”
Ndryshe, pas “fortunës në polici” i cili u propagandua dje si lëvizje e madhe brenda Policisë së Shtetit, arrestimi i Kryetarit të Bashkisë Lushnje entuziazmoi vetëm mediat në shërbim të pushtetit, pasi kemi të bëjmë me një kryebashkiak që opozita e ka denoncuar shumë kohë më parë dhe është injoruar si nga Kryeministri ashtu dhe SPAK.
