Arrestimi Maduros/ Të premten tryeza e opozitës, Berisha: Një front kundër narko-regjimit Edi Ramës

Pas aksionit të njësitit elit amerikan “Delta” dhe arrestimit në Venezuelë të narko-diktatorit Nicolás Maduro, Kryetari i Partisë Demokratike, Sali Berisha, ka kërkuar sot nga Kryeministri Edi Rama të japë dorëheqjen, sepse qytetarët po presin me padurim t’i japin ndëshkimin që meriton.

Ndërkohë për të premten ka paralajmëruar tryezën e frontit opozitar ku pritet të bashkërendohen veprimet kundër narko-regjimit të Edi Ramës nga protestat, demonstratat dhe revoltat e domosdoshme për largimin e tij një minutë e më parë.

“Edi Rama duhet të japë dorëheqjen menjëherë.
Koha e narko-diktatorëve po perëndon me shpejtësi.

Ajo që forcat Delta realizuan në një operacion të përsosur, të paparë ndonjëherë në histori, për mënyrën perfekte të realizimit kundër një narko-diktatori të urryer të popullit të Venezuelës, ka zgjuar popujt në të gjitha vendet e tjera që të ngrenë krye kundër diktatorëve të tyre.
Kam besim se shqiptarët, të cilët e kanë pritur siç keni parë ju, me interesin më të madh arrestimin në dhomën e tij të gjumit të narko-diktatorit të Venezuelës dhe paraqitjen e tij në sallën e gjyqit në Nju Jork, presin me padurim për t’u përballur me diktatorët e tyre dhe narko-diktatorin e tyre në rastin e tyre në Shqipëri, dhe për t’i dhënë atij ndëshkimin dhe vendin që meriton.
PD dhe opozita shqiptare është e vendosur të organizojë të gjitha demonstratat, protestat, revoltat në mënyrë që të çlirojë vendin nga ky narko-diktator, i parë dhe i vetëm në Europë,” tha Sali Berisha ndërsa foli dhe për tryezën e frontit opozitar për të bashkërenduar veprimet kundër narko-regjimit, që pritet të mbahet të premten.

“Opozita pa asnjë diskutim do të ketë protesta ndër më të fuqishmet.
Opozita thërret ditën e premte tryezën e të gjitha forcave politike dhe faktorëve influentë në shoqërinë shqiptare për të krijuar një bashkërendim, një front të gjerë kundër narko-regjimit të Edi Ramës dhe për të ndërmarrë të gjitha lëvizjet, protestat, demonstratat, revoltat e domosdoshme për largimin e tij një minutë e më parë.
Për opozitën, bllokimi nga Edi Rama i heqjes së imunitetit të Lubi Ballukut, marrja në mbrojtje e delinkuentes Mirlinda Karçanaj, e njohur tashmë për abuzimet e tmerrshme me Ergys Agasin në favor të familjes Rama, janë një thirrje e madhe për shqiptarët për t’u ngritur në revoltë për t’i dhënë narko-diktatorit të tyre atë fund të turpshëm që pati narko-diktatori i Venezuelës.”

Në fund, për të shuar kuriozitetin e të gjitha mediave që hodhën në treg karremin e Edi Ramës me Kryeministren e tij Teknike “Lea Ypi”, Kryetari i Partisë Demokratike tha se PD nuk diskuton asnjë emër për Kryeministër Teknik, pa arritur marrëveshjen për qeveri teknike.

“Partia Demokratike insiston dhe do të insistojë për një qeveri teknike për përgatitjen e një procesi të drejtë zgjedhor.
Partia Demokratike, nuk avancon as edhe një emër, pa u arritur marrëveshja për qeverinë teknike,” tha Kryetari i Partisë Demokratike, Sali Berisha, duke përfunduar:
“Pasi të arrihet marrëveshja për qeverinë teknike, pa diskutim PD do të avancojë, ose do të paraqesë propozimet e veta krahas forcave të tjera politike.”