Arrestohen 10 persona, në mesin e tyre edhe Ish-Kryetari i Shtërpcës
Prokuroria Themelore në Ferizaj ka bërë të ditur se ka arrestuar Ish-Kryetarin e Komunës Shtërpcë, Bratisllav Nikolliç dhe nëntë zyrtarë tjerë gjatë aksionit për ndërtime pa leje.
“Prokuroria Themelore në Ferizaj, ju njofton se me urdhër të saj dhe në koordinim të plotë me Policinë e Kosovës -Drejtorinë e Krimeve të Rënda në Prishtinë janë duke e zhvilluar një aksion në komunën e Shtërpcës.
Lidhur me këtë aksion deri më tani me urdhër të Prokurorit të Shtetit, janë arrestuar dhjetë (10) persona të dyshuar, në mesin e tyre edhe ish kryetari i komunës së Shtërpcës, drejtori i Urbanizmit, disa zyrtar të tjerë dhe pronar të firmave, për shkak të dyshimit të veprave penale “Marrja e ryshfetit”, “Dhënia e ryshfetit” dhe “Keqpërdorimi i pozitës apo autoritetit zyrtar” të Kodit Penal të Republikës së Kosovës (KPRK),” thuhet në njoftimin e Prokurorisë duke shtuar se me përfundimin e operacionit do të bëhen publike edhe detaje tjera.
Marrestimit të 10 kriminelëve serbë ka reaguar Drejtori i Zyrës për Kosovën pranë Qeverisë së Serbisë, Petar Petkoviç, duke akuzuar Policinë e Kosovës se “bastisi disa fshatra të Komunës së Shtërpcës dhe arrestoi disa serbë”, derisa e përshkroi situatën si “një përpjekje brutal për frikësimin e popullsisë serbe në Kosovë dhe terror i ri i kryeministrit, Albin Kurti.”
“Nën maskë dhe me arsyetimin e njëfarë lufte kundër korrupsionit, Albin Kurti sërish dërgoi njësinë speciale, me përgatitje të plotë luftarake në mjediset me shumicë serbe me qëllimin e vetëm që serbët, të cilët mbetën duke mbrojtur interesat tonë kombëtarë, t’i kriminalizojë,” tha Petar Petkoviç duke arsyetuar kështu me këtë retorikë dhe vendimin e Qeverisë së Kosovës që nuk i lejon këtij krimineli serb hyrjen në Kosovë.
Ndryshe, Shtërpca, është njëra prej gjashtë komunave me shumicë serbe në Kosovë që që u themelua në vitin 2009. Nga dita e parë deri në fund të nëntorit 2021, kryetari i saj ishte Bratisllav Nikolliç nga Lista Srpska, që drejtohet nga Beogradi zyrtar.
Para se t’i bashkohej Listës Srpska në vitin 2013, Nikolliç ishte kryetar i Shtërpcës si kanidat i Partisë së Pavarur Liberale, SLS, e cila në fillim të vitit 2020 shpalli moratorium politik me shfaqjen e Listës Srpska. Në zgjedhjet e fundit lokale që u mbajtën më 17 tetor, në Shtërpcë fitoi kandidati i Listës Srpska, Dallibor Jevtiç.
