Arrestohen 28 persona të “Ndrangheta”, Europol: Shqiptarët, përgjegjës për nxjerrjen e ngarkesave nga portet
Arrestimi i 28 personave të dyshuar si pjesë e një rrjeti të fuqishëm kriminal të lidhur me mafian italiane “Ndrangheta”, ndër të cilët edhe shtetas shqiptarë, ishte epilogu i operacionit ndërkombëtar i cili u zhvillua në Itali, Spanjë dhe Shqipëri dhe u koordinua nga Europol.
Shqiptarët, sipas Europol, dyshohet se ishin përgjegjës për nxjerrjen e ngarkesave nga porte në Spanjë dhe Holandë, si dhe për transportin drejt Italisë, ku lënda narkotike shpërndahej në qytete të ndryshme, përfshirë edhe kryeqytetin italian.
Sipas autoriteteve, grupi kriminal ka trafikuar të paktën 1 ton kokainë dhe rreth 1.5 ton hashash në 80 episode të dokumentuara, ndërkohë që hetimet zbulojnë përdorimin e dhunës ekstreme për të ruajtur kontrollin brenda organizatës.
Një nga rastet më tronditëse përfshin rrëmbimin dhe torturimin e një trafikanti droge nga katër anëtarë të mafies italiane. Tortura është filmuar me telefon dhe videoja është shpërndarë brenda grupit për të mbjellë frikë dhe nënshtrim.
Hetimi gjithashtu ka zbuluar përdorimin e metodave të sofistikuara të komunikimit të koduar, të mundësuar nga pajisje të shpërndara nga një ofrues shqiptar i shërbimeve kriminale, i cili gjithashtu u arrestua gjatë operacionit.
Ndryshe, krahasimit të informacionit me bazat e të dhënave, Europoli ofroi mbështetje analitike financiare dhe lehtësoi shkëmbimin e informacionit midis autoriteteve italiane dhe spanjolle, duke çuar në pesë arrestime në Spanjë gjatë hetimit, para ditës së aksionit.
Njoftimi i Europol
Europoli ka mbështetur forcat italiane të rendit në dhënien e një goditjeje të rëndë ndaj organizatës kriminale Ndrangheta. Më 8 korrik 2025 është zhvilluar një operacion i përbashkët në të gjithë Italinë, Spanjën dhe Shqipërinë, me ekipet speciale të ndërhyrjes që kanë arrestuar 28 kriminelë të dyshuar me kombësi italiane dhe shqiptare.
Midis individëve të ndaluar është një shtetas italian nga rajoni i Kalabrisë i dyshuar për ngritjen e strukturës kriminale për tregtinë e kokainës në zonën e San Basilio të Romës.
Ky individ, së bashku me tre djemtë e tij, dyshohet se bashkëpunonte ngushtë me një grup kriminal shqiptar, i cili merrej me disa nga aspektet logjistike të tregtisë së trafikut të drogës.
Anëtarët shqiptarë të këtij rrjeti dyshohet se organizonin nxjerrjen e ngarkesave nga porte të ndryshme spanjolle dhe holandeze, si dhe transportin e mëvonshëm në Itali. Përveç kësaj, ata ishin përgjegjës për shitjen e drogës në pjesë të tjera të Romës.
Hetimet tregojnë se kokaina e shitur në Itali është blerë në Amerikën e Jugut dhe është transportuar në kontejnerë në porte anembanë Evropës. Transporti nga porti i Gioia Tauro në Kalabri për në Romë dyshohet se është lehtësuar nga ndërmjetës kriminelë kalabrezë.
Tortura si mjet për të mbjellë frikë brenda organizatës kriminale
Personat e arrestuar dyshohet se kanë trafikuar të paktën 1019 kilogramë kokainë dhe 1497 kg hashash në 80 operacione trafikimi. Prokurorët dyshojnë se katër individë italianë kanë rrëmbyer një trafikant droge, duke i shkaktuar atij dëme fizike dhe psikologjike – një shembull i dhunës së rëndë që lidhet me organizatën kriminale Ndrangheta.
Tortura e ushtruar është filmuar me një telefon celular, dhe videoja është përhapur më pas me qëllim që të ngjallë frikë, heshtje dhe nënshtrim tek anëtarët e grupit kriminal të vendosur në Romë.
Ky hetim kompleks nxori në dritë edhe metodat e sofistikuara të komunikimit të përdorura për të shkëmbyer informacion brenda organizatës kriminale. Për të shmangur zbulimin nga autoritetet, anëtarët e saj mbështeteshin në mesazhe të koduara nëpërmjet pajisjeve të shpërndara nga një ofrues shërbimesh kriminale shqiptar, i cili u arrestua gjithashtu më 8 korrik.
Mbështetja e Europolit dhe bashkëpunimi ndërkombëtar
Në ditën e aksionit, një ekspert i Europolit me një zyrë të lëvizshme u dërgua në Itali për të krahasuar informacionin me bazat e të dhënave të Europolit. Europoli ofroi mbështetje analitike financiare dhe lehtësoi shkëmbimin e informacionit midis autoriteteve italiane dhe spanjolle, duke çuar në pesë arrestime në Spanjë gjatë hetimit, para ditës së aksionit.
