Arrestohen 4 zyrtarë në Telekomin e Kosovës, Policia jep detajet

Prokuroria e Kosovës në bashkëpunim me Krimet Ekonomike ka arrestuar 4 zyrtarë të lartë të Postë dhe Telekomit të Kosovës. Zëdhënësi i Policisë së Kosovës, Baki Kelani tha se gjatë një operacioni policor sot u arrestuan katër persona me dyshimin për keqpërdorim të pozitës zyrtare.

“Sot me 30 mars 2021, Policia e Kosovës, me urdhëresë të Gjykatës kompetente ka realizuar një operacion policor, i cili ka rezultuar me arrestimin e katër personave të dyshuar, mbi dyshimin për keqpërdorim të pozitës zyrtare. Operacioni policor është realizuar në rajonin e Prishtinës, ku pas kompletimit të rastit do të jepen informacione shtesë,” tha Baki Kelani për KosovaPress.

Ndërsa, nga zyra për komunikim e Telekomit të Kosovës u tha se janë arrestuar dy-ish punonjës.

“Janë dy ish punonjës te Telekomit të Kosovës, që ka kohe që nuk janë pjesë e jona,” thuhet në përgjigjen e Telekomit dhënë për KosovaPress. 

Ndërkohë mediat në Kosovë raportojnë se janë arrestuar, Armend Osaj dhe Trim Musliu, me akuzën e nënshkrimit të disa kontratave me shuma të larta.