Arrestohen personat që dogjën flamurin e Turqisë

Policia e Kosovës ka arrestuar dy persona në Gjakovë pasi që në rrjetet sociale kanë publikuar video duke djegur flamurin e Turqisë.

Pas kësaj, nisën edhe hetimet për këta persona.

Sipas Policisë të dyshuarit janë shoqëruar në Polici dhe pas intervistimit me vendim të prokurorit rasti shkon në procedurë të rregullt.

Ndryshe, pas publikimit të videos në rrjetet sociale ku shihen disa persona duke i vënë flakën flamurit të Turqisë ndërsa dëgjohen duke thënë se janë në “përkrahje të Gjergj Dedajt, poshtë Turqia, poshtë Serbia, kalle Erdoganin”, e fjalë të ngjashme, Kryeministri i Kosovës, Ramush Haradinaj, ka reaguar ashpër duke deklaruar se Qeveria e  Kosovës rithekson fuqishëm qëndrimin e saj kundër deklarimeve dhe gjuhës fyese ndaj Republikës së Turqisë dhe popullit turk, nga kushdo qoftë në vendin tonë:

“Qeveria, gjithashtu, dënon fuqishëm çdo akt vandal që përdhosë simbolet nacionale dhe shtetërore të Republikës së Turqisë. Qeveria e Kosovës është e përkushtuar në ndërtimin e raporteve të mira me të gjitha vendet e rajonit dhe ka konsideratë të veçantë për bashkëpunimin e mirë me vendet që kanë njohur dhe ndihmuar pavarësinë e Kosovës”, thekson Haradinaj.

Ndërkohë reagoi edhe vetë Zv/ministri i Punëve të Jashtme të Kosovës, Gjergj Dedaj:

“Gjergjin e mbronë Gjergji!”