Arrestohet autori i masakrës së 34 shqiptarëve në Burim të Malishevës

Një person është arrestuar sot në Prishtinë nën dyshimin për përfshirje në krime lufte kundër popullatës civile, gjatë luftës në Kosovë.

Arrestimi është kryer në mëngjesin e sotëm nga Policia e Kosovës, konkretisht nga hetuesit e Drejtorisë për Hetimin e Krimeve të Luftës, me urdhër të Prokurorisë Speciale të Kosovës.

“I dyshuari me inicialet R.M., sipas hetimeve paraprake, dyshohet se në periudhën 29-31 mars 1999, në bashkëkryerje me pjesëtarë të forcave policore dhe ushtarake serbe, ka marrë pjesë në masakrën e 34 civilëve shqiptarë në fshatin Burim, Komuna e Malishevës,” thuhet në njoftimin e përbashkët nga Prokuroria Speciale e Kosovës dhe Policia e Kosovës.

Sipas Prokurorisë, gjatë fazës hetimore janë siguruar prova materiale, duke përfshirë dëshmi të dëshmitarëve okularë dhe të mbijetuarve të kësaj masakre.

Brenda afateve ligjore, siguron Prokuroria Speciale do të paraqesë kërkesën për caktimin e masës së paraburgimit ndaj të dyshuarit, në Gjykatën Themelore të Prishtinës – Departamenti Special.