Arrestohet bashkëshorti i Ministres së Arsimit
Sot në mëngjes është arrestuar bashkëshorti i Ministres së Arsimit, Besa Shahini dhe deputeti aktual i Partisë Socialdemokrate të Kosovës, Dardan Molliqaj, ka bërë të ditur policia.
“Molliqaj është arrestuar nën arsyetimin për pjesëmarrje në protestën për lirimin e deputetit Albin Kurti, në vitin 2015. Arrestimi i deputetit në fjalë ka qenë në kundërshtim me liritë dhe të drejtat e njeriut dhe në shkelje të plotë të procedurave ligjore. Për këtë arsye, ajo protestë ka qenë e drejtë dhe e nevojshme,” raporton Televizioni publik i Kosovës, RTK, duke cituar PSD-në.
“PSD është për shtet të së drejtës, ku respektohet liria për protestë dhe kritikë. Prandaj, për ne është e papranueshme çfarëdo përpjekje për cenimin e tyre”, thuhet në reagimin e PSD-së e cila kërkon lirimin e menjëhershëm të deputetit Dardan Molliqaj.
Por në reagimin e saj Policia e Kosovës ka sqaruar se sot ka realizuar një urdhër arrest të Gjykatës Themelore në Prishtinë, respektivisht Departamenti i Përgjithshëm.
Urdhër-arresti është lëshuar me datën 12 maj dhe në të janë specifikuar detyrimet, për policinë, që i pandehuri D.M, të dërgohet në objektin e Pallatit të Drejtësisë, saktësisht në Prokurorinë themelore.
“Aktualisht policia sipas rregullit po kryen të gjitha veprimet e nevojshme procedurale për të përmbushur plotësisht urdhëresën e gjykatës”, thuhet në njoftimin e Policisë së Kosovës.
