Arrestohet Fatos Tushe, Basha: Mund të jetë një fillim i mbarë!

Pas arrestimit të Kryetarit të Bashkisë Lushnjë, Fatos Tushe dhe 10 zyrtarëve të tjerë ka reaguar Kryetari i Partisë Demokratike, Lulzim Basha, duke rikujtuar denoncimet shumëvjeçare nga PD të bashkëpunimit të tij korruptiv me krimin e organizuar ndërsa vlerëson se mund të jetë një fillim i mbarë.

“Arrestimi i Fatos Tushës pas denoncimeve shumëvjeçare nga PD të bashkëpunimit të tij korruptiv me krimin e organizuar, mund të jetë një fillim i mbarë. Por kjo do të varet nga aftësia, kurajo dhe pavarësia e drejtësisë për të goditur lidhjet e pushtetit me krimin,” thekson Lulzim Basha në reagimin e tij përmes rrjetit social Twitter duke shtuar:

“Lidhjet e Hakmarrjes për Drejtësi me Tushën, Braçen dhe vetë Ramën, dhe përfitimet e tyre të ndërsjellta në vite të gjata bashkëpunimi.”

Ndryshe, Partia Demokratike pas disa deononcimeve ka reaguar edhe pas ngjarjes së rëndë në Lushnjë ku mbeti i plagosur Kryetari i Bashkisë, Fatos Tushe, duke theksuar se të gjitha rrethanat tregojnë se goditja e kryebashkiakut të Lushnjës është prishje pazaresh mes tij dhe ish shoferit, me të cilin ka ndarë bashkë para nga droga, prostitucioni dhe korrupsioni.

“Është fakt i njohur në Lushnjë, se ish shoferi i kryetarit të Bashkisë Lushnjë, një trafikant droge dhe prostitucioni, ka financuar fushatën elektorale të Fatos Tushes. Çdo lushnjar e di se personi që ka kryer sot goditjen kundër kryebashkiakut, ishte njeriu më i besuar i Fatos Tushes dhe që bënte çdo pazar në emër të tij,” thekson PD në reagimin e saj pas kësaj ngjarje të dhënë duke e cilësuar si tregues të degradimit të shtetit të ndërtuar prej Edi Ramës, si dhe një fakt më shumë se njerëzit me të cilët ai përfaqësohet, ble vota dhe mban pushtetin janë llumi i shoqërisë.