Arrestohet Milaim Zeka. Prokuroria: Ja arsyet…
Sot në mëngjes, mediat në Kosovë raportuan se rreth orës 09:00 është arrestuar deputeti i NISMA, Milaim Zeka, për shkak të kërcënimit të prokurorit special, Afrim Shefkiu dhe i është caktuar masa e ndalimit prej 48 orëve.
Pas më shumë se dy orësh, Zv/kryeprokurori i Prishtinës, Ibrahim Berisha e ka konfirmuar arrestimin e deputetit të Nismës, Milaim Zeka, duke konfirmuar edhe lajmin në media se arrestimi i deputetit Zeka ka ardhur pas deklaratave të tij, ku kishte kërcënuar prokurorin Afrim Shefkiu, dhe i është caktuar masa e ndalimit prej 48 orëve.
Deputeti Milaim Zeka ditë më parë kishte deklaruar se do të merret edhe me kanun me prokurorin që e ka ngritur aktakuzën në rastin e tij për manipulimet me vizat.
“Ma përpara ia kisha falë nëse ma kish vra njërin prej fëmijëve në afekt sesa kështu me ia shkatërru njerëzve ëndrrat. Mua më kanë poshtëruar. Unë do ta ndjek këtë prokurorin tëm me gjyq, me kanun e edhe privatisht. Nuk ia fali kurrë poshtërimin. Se njerëzit tash thonë për mua: Kqyre ky hajni i vizave,” ka thënë Milaim Zeka.
