Arrestohet një serb i dyshuar për krime lufte  

Policia e Kosovës ka arrestuar një person nga komuniteti serb, nën dyshimin për krime lufte kundër popullsisë civile, është thënë në një komunikatë për media të këtij institucioni.

Arrestimi i tij është thënë të jetë bërë bazuar në deklaratat e dëshmitarëve dhe informacioneve në rrugë operative.

Me vendim të prokurorit, raporton RFE, i ndaluari është dërguar në mbajtje.

Policia e Kosovës nuk e ka bërë të ditur identitetin e tij.

Ndërkohë, Drejtori i Zyrës për Kosovën në Qeverinë serbe, Petar Petkoviç, tha se i arrestuari është ish-polici serb, Sllagjan Trajkoviç.

“Si po shfaqen papritmas provat kundër serbëve, sapo u larguan nga institucionet, e që nuk ekzistonin derisa ishin pjesë e institucioneve të Kosovës,” thekson Petkoviç në reagimin e tij përmes rrjetit social Twitter.

Që nga fillimi i muajit nëntor, raporton RFE, pjesëtarë serbë të Policisë së Kosovës në katër komunat e banuara me shumicë serbe, kanë dhënë dorëheqje nga pozitat e tyre, si shenjë kundërshtimi ndaj vendimit të Qeverisë së Kosovës për riregjistrim të makinave me targa serbe në RKS – Republika e Kosovës.

Në luftën e zhvilluar në Kosovë më 1998/99, janë vrarë mbi 13.000 civilë dhe mijëra të tjerë janë zhdukur. Mbi 1.600 persona vazhdojnë të jenë ende të pagjetur – pjesa më e madhe e tyre shqiptarë.

Kosova ka shpallur pavarësinë në vitin 2008 dhe njihet nga mbi 100 vende të botës.

Serbia nuk e njeh pavarësinë e saj dhe në Kushtetutë vazhdon ta konsiderojë atë si pjesë të territorit të saj.