Arrestohet një serb me 107 kg marijuanë nga Shqipëria

Policia e Kosovës ka arrestuar një serb me 107 kilogramë marijuanë që po trafikonte nga Shqipëria.

“Policia e Kosovës në bashkëpunim me Doganën e Kosovës, në terminal doganor, ka ndaluar një kamion ‘Iveco’ me targa të huaja të cilin e drejtonte i dyshuari M.P., (1991), shtetas i Serbisë. Ndalimi u bë për shkak të dyshimeve se i njëjti kishte substancë narkotike,” thuhet në njoftimin e policisë duke saktësuar se në bashkëpunim me oficerët e Doganës së Kosovës, gjatë kontrollimit në dy rezervuarët e derivateve janë gjetur bunkerë të modifikuar, ku në brendi kishte 101 paketime të plastikës me të substancë narkotike të dyshuar të llojit marijuanë.

“Nga Njësia e Forenzikës është bërë sekuestrimi dhe tërheqja e dëshmive, ku pesha e përgjithshme e narkotikëve të sekuestruar ka qenë rreth 107 kilogramë. Po ashtu në cilësi të provave janë sekuestruar edhe një telefon celular, një GPS, disk diagrami i tahografit, një kamion, 95 euro si dhe 2.500 dinarë,” ndërsa drejtuesi i kamionit është ndaluar për 48 orë ndërkohë që rasti po procedohet për veprime të mëtutjeshme, përderisa vazhdojnë veprimet hetimore nga drejtoria përkatëse.