Arrestohet një serb për sulmin ndaj gazetarëve në Leposaviç

Policia e Kosovës ka arrestuar një të dyshuar për sulmin ndaj gazetarëve në Leposaviç më 16 qershor.

Sipas Policisë së Kosovës, i dyshuari është i komunitetit serb, i identifikuar me iniciale, U.V.

“Sot, në orët e hershme të mëngjesit është arrestuar i dyshuari i radhës mashkull serb U.V., me vendbanim në një fshat të komunës së Leposaviçit, i dyshuar për përfshirje në një rast sulm ndaj mediave/gazetarëve,” thekson policia përmes një njoftimi ndërkohë mësohet se bëhet fjalë për Urosh Vukashinoviçin.

Policia njofton se arrestimi i tij dhe shoqërimi në stacion policor është kryer si rezultat i hetimeve intensive dhe i sigurimit të dëshmive, se i njëjti është përfshirë në sulm ndaj mediave/gazetarëve me datë 16 qershor 2023.

“Angazhimi dhe përkushtimi i Policisë së Kosovës, do të vazhdojë për ruajtje të rendit dhe sigurisë publike, për sundim të ligjit dhe sjelljen para organeve të drejtësisë së personave të dyshuar që bien në kundërshtim me rendin dhe ligjin,” thekson Policia e Kosovës duke shtuar se të gjitha veprimet e mëtejme do të ndërmerren në bashkëpunim dhe koordinim me organet e drejtësisë.

Ndryshe, pas tensioneve më 16 qershor në Leposaviç ku kryetari e ri të komunës e vizitoi ministri i Administrimit të Pushtetit Lokal, Elbert Krasniqi, u sulmuan edhe mediat.

Pamjet kur protestuesit serbë sulmuan gazetarët shqiptarë ndërsa me egërsi ekstreme ushtruan dhunë ndaj kameramanit të RTK-së, Bardh Bekteshi, bënë xhiron e botës, ashtu si dhe refuzimi i KFOR-it për ti ndihmuar gazetarët që po iknin nga protestuesit e tërbuar serbë.

Fatmirësisht nuk kishte viktima ndonëse u sulmuan edhe nëntë gazetarë ndërsa shqiptarët e Kosovës ishin dëshmitarë të refuzimit të mbrojtjes nga ndërkombëtarët në shumë raste në trazirat e veriut, madje kujtojnë dhe rastin e vetëm dy viteve pas çlirimit kur nga dora serbe humbën jetën 11 persona dhe u plagosën dhjetëra të tjerë!