Arrestohet personi që filmoi rrëzimin e avionit në Iran

Irani ka bërë të ditur se ka arrestuar një person që ka filmuar momentin kur është rrëzuar avioni ukrainas me pasagjerë, pas sulmit me raketë. Besohet se personi, i cili është ndaluar do të përballet me akuza të lidhura me siguri kombëtare, raporton RFE.

Fluturimi, PS752 ka dështuar pak minuta pas nisjes, pasi aeroplani është rrëzuar javën e kaluar në Teheran, duke lënë të vdekur 176 persona në bord.

Irani ka deklaruar se ka rrëzuar avionin gabimisht dhe ka njoftuar për arrestimin e dhjetëra personave lidhur me këtë incident.

Presidenti iranian, Hassan Rohani tha se hetimet e shtetit të tij do të vëzhgohen nga një “gjykatë speciale”.

“Ky nuk do të jetë rast i zakonshëm. E gjithë bota do të shikojë këtë gjykatë,” tha ai duke shtuar se për këtë “rast tragjik” nuk duhet fajësuar vetëm një person.

“Nuk ka të bëjë vetëm me personin që ka nisur sulmim, mirëpo edhe me të tjerë që janë përgjegjës,” tha Rohani.

Irani fillimisht ka mohuar se avioni ukrainas është qëlluar nga një raketë, mirëpo më vonë ka thënë se kjo pajisje është qëlluar nga sistemet mbrojtëse të Iranit.

Kur disa video janë publikuar nëpër rrjete sociale, analistët kanë filluar të kenë dyshimet e para se avioni është qëlluar nga një raketë.