“Arrestoni Vuçiçin”, protesta kundër masave anti-covid në Beograd

“Arrestoni Vuçiçin” , “Shkoni n’Kosovë” ishin thirrjet e protestuesve që ishin mbledhur në Beograd kundër masave për përhapjen e koronavirusit që paralajmëroi Presidenti i Serbisë, Aleksandar Vuçiç, dhe u përplasën me policinë pasi arritën të futen në Parlamentin e Serbisë.

Për të larguar protestuesit nga godina e parlamentit, policia përdori edhe dhunë por ata vazhduan të protestojnë para Parlamentit të Serbisë.

Protestat e qytetarëve serb filluan pasi Presidenti i Serbisë, Aleksandar Vuçiç, pasi paralajmëroi masat edhe për Beogradin dhe orën policore për fundjavë, për shkak të situatës epidemiologjike, tha se do të ishte i kënaqur sikur ndalimi i lëvizjes dhe ora policore të vendoset në gjithë vendin dhe jo vetëm në 18 qytete, por për këtë do të vendos Shtabi i Krizës.

Ndryshe, në 24 orët e fundit në Serbi kanë vdekur 13 persona nga koronavirusi ndërsa janë shënuar 299 raste të reja me COVID-19.

Në spitale janë shtruar 2.942 pacientë, 110 prej të cilëve janë në respiratorë.

Deri më sot janë testuar 455.604 persona, 16.719 rezultuan pozitiv 330 prej të cilëve humbën betejën me koronavirus.