Arrihet marrëveshja, BE: Ndalohet dërgimi i mbeturinave në vendet që nuk mund t’i përpunojnë

Ligjvënësit e Bashkimit Evropian, BE, dhe vendet anëtare kanë arritur një marrëveshje për të rishikuar rregulloren e bllokut për dërgesat e mbeturinave dhe për t’i dhënë fund eksporteve të llojeve të caktuara të tyre në vendet e treta që nuk janë në gjendje t’i përpunojnë siç duhet.

“Eksportet e disa mbeturinave jo të rrezikshme dhe përzierjet e tyre do të lejohen vetëm në ato vende që nuk janë anëtare të OECD-së që pranojnë dhe përmbushin kriteret për trajtimin e mbetjeve të tilla në një mënyrë të shëndoshë mjedisore,” thuhet në marrëveshjen e arritur sot nga Parlamenti Evropian.

PE, raporton RFE, thekson se do të merret parasysh edhe pajtueshmëria me të drejtat ndërkombëtare të punëtorëve.

Në vitin 2021, Komisioni Evropian propozoi një rinovim të rregullave të BE-së për dërgesat e mbeturinave për ta bërë më të vështirë për shtetet anëtare shkarkimin e tyre në vendet më të varfra.

“BE më në fund do të marrë përgjegjësinë për mbeturinat e saj plastike duke ndaluar eksportin e tyre në vendet jo anëtare të OECD”, tha në një deklaratë ligjvënësi danez, Pernille Weiss.

Vendet e BE-së duhet të ndalojnë dërgimin e mbeturinave plastike në vendet më të varfra jo më larg se dy vjet e gjysmë nga hyrja e legjislacionit në fuqi, tha Parlamenti.

Gjithashtu u bë e ditur se do të shtrëngohen rregullat për eksportet e mbeturinave plastike në vendet brenda OECD, grupit të vendeve kryesore të pasura në botë.

Në vitet e mëparshme, raporton RFE, rreth gjysma e eksporteve të mbeturinave të BE-së shkuan në vendet jo anëtare të OECD-së me rregulla më të dobëta të menaxhimit të tyre sesa në BE, duke transportuar ndotjen e BE-së jashtë vendit.