Arrihet marrëveshja e VMRO-DPMNE me BDI; LSDM: Abuzim mediatik!

Mediat në Maqedoninë e Veriut kanë raportuar sot se VMRO-DPMNE dhe BDI kanë arritur marrëveshje për koalicionin qeverisës por LSDM e cila është fituese me 46 mandate i quan abuzime mediatike.

“Është e qartë se tekstet e botuara janë pozicionim politik përmes abuzimit mediatik, me qëllim që të arrihen pozita më të mira para publikut, por edhe në negociatat e subjekteve të caktuara politike. Ne theksojmë se LSDM ka siguruar shumicë për formimin e qeverisë. Kjo do të dëshmohet ditët në vijim  pasi të merret mandati nga Presidenti Stevo Pendarovski dhe kur të vijë akti i votimit në Parlament,” thekson LSDM e Zoran Zaevit pas publikimit të lajmit mbi arritjen e marrëveshjes në mes të VMRO-DPMNE dhe BDI të cilat së bashku kanë 59 nga gjithsejtë 120 ulëse që ka Parlamenti i Maqedonisë së Veriut dhe për krijimin e qeverisë i duhen të paktën edhe 2 mandate.

VMRO-DPMNE dhe BDI, raportojnë mediat, llogarisin në mbështetjen e 2 deputetëve të së Majtës dhe PDSH, si dhe në 4 deputetët e Alternativës së Afrim Gashit.