Arrihet marrëveshja për qeverinë e re gjermane, kancelar Friedrich Merz

Konservatorët e Gjermanisë të CDU/CSU kanë arritur marrëveshje koalicioni me Partinë Socialdemokrate të qendrës së majtë, SPD, për formimin e qeverisë së re gjermane.

Marrëveshja erdhi pas disa javësh negociatash të vështira pasi aleanca e qendrës së djathtë, e përbërë nga kristiandemokratët e CDU të Friedrich Merz dhe unionit CSU, fitoi zgjedhjet parlamentare më 23 shkurt.

Sipas marrëveshjes së koalicionit, SPD do të marrë Ministrinë e Financave, Ministrinë e Mbrojtjes dhe Ministrinë e Drejtësisë ndërsa Ministria e Brendshme dhe ajo e Jashtme do t’i përkasin demokristianëve.

SPD ka kërkuar 10 ditë që marrëveshja e koalicionit të votohet në parti por për shkak të Pashkëve mund të zgjasë pak më shumë. CDU pritet ta votojë marrëveshjen në kongresin e partisë që pritet të mbahet më 28 Prill.

Nëse gjithçka shkon sipas planit, 69-vjeçari Friedrich Merz do të zgjidhet kancelar më 7 maj 2025, vlerëson Kryetari i Grupit Parlamentar të CSU, Alexander Dobrindt.

Ndryshe, CDU në zgjedhjet parlamentare federale të 23 shkurtit doli e para duke fituar 28.5 për qind të votave, por u detyrua të kërkonte një partner koalicioni për të siguruar shumicën në Bundestag.