ARRSH hap tenderin për fazën IV të Elbasan-Qafë Thanë, fondi limit 23.4 milionë euro
Autoriteti Rrugor Shqiptar, ARRSH, hapi sot procedurën për lotin 4 të rrugës Elbasan-Qafë Thanë me një fond limit rreth 2.5 miliardë lekë apo rreth 23.4 milionë euro. Kjo procedurë vjen vetëm pak ditë pas çeljes së procedurës për dy akse të tjerë siç ishte loti 3 i të njëjtit aks si dhe Qafë Bualli-Martanesh me një fond limit kumulativ prej 33.5 milionë euro.
Në dokumentet e tenderit të bashkangjitur nga ARRSH sa i takon lotit 4 të rrugës Elbasan-Qafë Thanë nënvizohet se kjo fazë e projektit të zbatimit, ka një gjatësi 1 860 metra linearë. Ky segment fillon ne km 14+600, 50m para urës ekzistuese të Librazhdit dhe përfundon në kilometrin 16+460, 150metra pas daljes së tunelit hekurudhor.
Rruga Elbasan-Qafë Thanë ka nisur tashmë prej disa kohësh dhe në terren po punohet për lotin 1 dhe dy ku punimet sipas inspektimeve të zhvilluara në terren dhe gjatë daljeve publike të përfaqësuesve të Ministrisë së Infrastrukturës dhe ARRSH kanë pasur ecuri të shpejtë. Projekti në total ka një gjatësi 50.12 kilometra.
“Nga ana e Investitorit (ARRSH) kërkohet që të realizohet një ndërhyrje në përmasimin e kushteve të lëvizjes në segmentin ekzistues rrugor nga Dalja e Qytetit te Elbasanit deri në Qafë Thanë. Gjatësia totale e projektit është 50.12 km. Kjo rrugë i shërben banorëve jo vetëm të zonës midis Elbasanit dhe Korçës, por edhe të gjithë turistëve vendas dhe te huaj, të cilët frekuentojnë zonën e Pogradecit dhe Korçës si dhe shtetasve të huaj dhe vendas të cilët lëvizin në drejtim të Greqisë dhe Maqedonisë.
Rruga nacionale ekzistuese Elbasan – Qafë Thanë ka gjerësi totale 9 – 9.5m (8 m gjerësi asfalti dhe bankina me gjerësi 0.5-0.75). Ashtu siç u përmend edhe më sipër, rruga ekzistuese ka nevojë për ndërhyrje në elementët gjeometrik, shtresat rrugore, në sistemin e trotuareve, ndriçimit rrugor të zonave urbane, sistemin e kanalizimeve të ujërave të shiut, sinjalistikë vertikale dhe horizontale.
Për shkak se kjo rrugë është gjithashtu pjesë e korridorit 8 dhe duke qenë se pala Maqedonase ka avancuar shumë duke kryer Projekt-Zbatimin e rrugës Qafë-Thanë-Struge-Gostivar me parametrat e një rruge të Kategorisë A, ARRSH nëpërmjet Vendimit të Këshillit Teknik pas miratimit të fazës së Projekt-Idesë, ka vendosur kryerjen e projekt-zbatimit sipas parametrave teknik të Kategorisë B (Interurbane Kryesore )” thuhet në dokumente.
Pak javë më parë Ministrja e Infrastrukturës dhe Energjisë Belinda Balluku konfirmoi se projekti për rrugën lidhur me daljen në Maqedoni ka ndryshuar dhe pika e re e daljes është afër Urës së Bushtricës. Projektit i shtohet një tunel 3 kilometra i gjatë. Ndërkohë në vitin 2024 është parashikuar të nisë projektimi dhe zgjerimi i rrugës nga Elbasani në Lekaj me dalje në Rrogozhinë për të krijuar kështu akses të mirëfilltë në korridorin VIII teksa lidhja do të jetë e dyfishtë edhe përmes Kashar-Lekaj./Monitor/
