Asambleja e Përgjithshme e OKB miraton propozimin e Shqipërisë
Me 107 vota për, 13 kundër dhe 39 abstenime, Asambleja e Përgjishme e Kombeve të Bashkuara ka miratuar propozimin e Shqipërisë për votimin e hapur të draftit të rezolutës amerikane për dënimin e referendumit në rajonet ukrainase të Luhanskut, Donjeckut, Hersonit dhe Zaporizhjës.
Para procesit të votimit, përfaqësuesi i përhershëm i Rusisë në OKB, Vasilij Nebenzja tha se Moska angazhohet për mbajtjen e votimit të fshehtë.
Shtetet perëndimore kanë përgatitur një rezolutë për miratim në Asamblenë e Përgjithshme të OKB e cila nuk pranon referendumet dhe i bënë thirrje të gjitha shteteve, organizatave ndërkombëtare dhe strukturave të specializuara që të mos e pranojnë ndryshimin e statusit të rajoneve ukrainase të Luhanskut, Donjeckut, Hersonit dhe Zaporizhjës.
Në tekstin e rezolutës, gjithashtu bëhet thirrje që të mos pranohet bashkimi i këtyre rajoneve Federatës Ruse ndërsa i bëhet thirrje Moskës që të tërheq menjëherë forcat e saj nga Ukraina. Drafti i rezolutës shpreh angazhimin për sovranitetin dhe integritetin territorial të Ukrainës ndërsa dënon Moskën për organizimin e referendumit dhe aneksimin e rajoneve ukrainase të Luhanskut, Donjeckut, Hersonit dhe Zaporizhjës.
Ndryshe, më 30 shtator, Presidenti i Rusisë, Vladimir Putin, pasi iu drejtua kombit me shpalljen e rezultateve të referendumit në rajonat ukrainase të Luhanskut, Donjeckut, Hersonit dhe Zaporizhjës, me liderët e tyre firmosi marrëveshjen për pranimin e këtyre rajoneve në kuadër të Rusisë.
Pas këtij aktrimi publik, Putin vazhdoi me aktin e fundit të kësaj drame të turpshme dhe tragjike ruse, duke firmosur dhe dekretin i cili pranon këto rajone në Federatën Ruse.
