Asambleja e Përgjithshme e OKB-së miraton Rezolutën e SHBA-Shqipëri për Ukrainën
Me 143 vota pro, 5 kundër dhe 35 abstenime, Asambleja e Përgjithshme e OKB-së miratoi Rezolutën e propozuar nga SHBA dhe Shqipëria në Këshillin e Sigurimit, “Integriteti territorial i Ukrainës: mbrojtja e parimeve të Kartës së Kombeve të Bashkuara”.
Duke bërë thirrje ta votojnë këtë Rezolutë të përgatitur nga shtetet perëndimore, Ambasadorja e SHBA në OKB, Linda Thomas Greenfield, tha se votimi është i rëndësishëm jo vetëm për të ardhmen e Ukrainës dhe të ardhmen e Evropës, por për vetë themelet e institucionit.
“Në fund të fundit, OKB u ndërtua mbi një ide: Se kurrë më një vend nuk do të lejohej të merrte me forcë territorin e tjetrit,” tha Linda Thomas Greenfield duke shtuar se Rezoluta bën thirrje për paqe dhe refuzon tentativat për aneksime të Rusisë.
Përveç Rusisë, kundër Rezolutës votuan edhe Bjellorusia, Siria, Nikaragua dhe Korea e Veriut.
Pas votimit, Presidenti i Ukrainës, Volodymyr Zelensky, duke reaguar përmes rrjetit social Twitter, Rezolutën e quajti “historike” ndërsa falënderoi shtetet që votuan pro.
Rezoluta e përgatitur nga shtetet perëndimore, nuk pranon referendumet dhe i bënë thirrje të gjitha shteteve, organizatave ndërkombëtare dhe strukturave të specializuara që të mos e pranojnë ndryshimin e statusit të rajoneve ukrainase të Luhanskut, Donjeckut, Hersonit dhe Zaporizhjës.
Në tekstin e rezolutës, gjithashtu bëhet thirrje që të mos pranohet bashkimi i këtyre rajoneve Federatës Ruse ndërsa i bëhet thirrje Moskës që të tërheq menjëherë forcat e saj nga Ukraina. Rezoluta shpreh angazhimin për sovranitetin dhe integritetin territorial të Ukrainës ndërsa dënon Moskën për organizimin e referendumit dhe aneksimin e rajoneve ukrainase të Luhanskut, Donjeckut, Hersonit dhe Zaporizhjës.
Ndryshe, më 30 shtator, Presidenti i Rusisë, Vladimir Putin, pasi iu drejtua kombit me shpalljen e rezultateve të referendumit në rajonet ukrainase të Luhanskut, Donjeckut, Hersonit dhe Zaporizhjës, me liderët e tyre, firmosi marrëveshjen për pranimin e këtyre rajoneve në kuadër të Rusisë. Pas këtij akti, firmosi dhe dekretin i cili pranon këto rajone në Federatën Ruse.
