Asambleja sot shqyrton Ligjin, PD: Me porosi të dy deputetëve të PS, Gjinushit i jep mandatin e dytë!

Ndërsa po zhvillohej mbledhja e Asamblesë së akademikëve, Partia Demokratike përmes deputetes Ina Zhupa ka denoncuar kreun e kësaj Akademie, Skender Gjinushi, i cili vazhdon e mban postin në mënyrë të paligjshme dhe sot pret që të shqyrtohe Ligji i cili i mundëson atij edhe mandatin e dytë në krye të Akademisë së Shekncave.

“Vazhdon dhe e mban postin të padekretuar nga Presidenti i Republikës. Është një kryetar i cili sot është në Gjykatën Kushtetuese, për cilësitë e tij si kryetar, dhe nga ana tjetër pres që kjo asamble sot e akademikëve të marri në shqyrtim edhe ligjin me porosi, që ka porositur Skënder Gjinushi, për dhënien e një mandati të dytë vetes së tij në krye të akademisë,” shprehet Ina Zhupa duke shtuar se po ky ligj me porosi të dy deputetëve socialistë u mundëson tejzgjatjen e mandatit edhe Nënkryetarit dhe Sekretarit të Akademisë ndërsa përfundoi:

“Mos u çudisni që në mandatin e radhës të Skënder Gjinushit, të kemi akademik edhe Petro Koçin, për shkak se po bën ligjin me porosi për t’i zgjatur dhe për t’i dhënë mandatin e dytë Skënder Gjinushit.”

Deklaratë:

Përfitoj nga rasti duke qenë se jemi në këtë lidhje live për të shprehur ngushëllimet për viktimat e tërmetit në Turqi dhe në Siri. Shërim të shpejtë ata që janë të lënduar nga kjo ngjarje tragjike që ka ndodhur në Turqi dhe në Siri.

Ndodhemi këtu, siç ju e dini, në oborrin e Akademisë së Shkencave, i cili duhet të ishte në fakt institucioni që prodhonte lajme pozitive. Institucioni që prodhonte shkencë, institucioni që fliste për zhvillimet e vendit, zhvillimet ekonomike, për zhvillimet sociale, ashtu siç jepte mundësinë për të ecur përpara edhe në kulturën e albanologjisë, gjuhësisë, në gjithçka që lidhet me identitetin e historisë shqiptare.

E kundërta ndodh prapa këtyre mureve sot, ku është duke u zhvilluar mbledhja e asamblesë së akademikëve, që në një rast normal unë do të isha duke e ndjekur këtë mbledhje për shkak të funksioneve të mia si deputete në Komisionin e Edukimit, por është duke u zhvilluar në kushtet e një mungese legjitimiteti.

Akademikët këtu janë përballë një kryetari i cili vazhdon e mban postin në mënyrë të paligjshme. Vazhdon dhe e mban postin të padekretuar nga Presidenti i Republikës. Është një kryetar i cili sot është në Gjykatën Kushtetuese, për cilësitë e tij si kryetar, dhe nga ana tjetër pres që kjo asamble sot e akademikëve të marri në shqyrtim edhe ligjin me porosi, që ka porositur Skënder Gjinushi, për dhënien e një mandati të dytë vetes së tij në krye të akademisë.

Pra, edhe pse e mban mandatin e tij sot që flasim në mënyrë të paligjshme, ka bërë një ligj me porosi nga dy deputetë socialistë për të tejzgjatur edhe një mandat tjetër për veten, nënkryetarin dhe sekretarin e akademisë.

Unë pres që akademikët të jenë të shqetësuar. Ata akademikë të ndershëm, ata akademikë që realisht e meritojnë këtë emër të rëndësishëm. Vetëm ne kemi mbetur sot të shqetësuar që kemi në krye ende Skendër Gjinushin si përfaqësues të Akademisë së Shkencave në grupin e punës dhe në ligjin e shkencës.
Përfaqëson Akademinë e Shkencave si kryeenciklopedist, si kryehistorian në projektin e historisë, si kryegjuhëtar në projektin e fjalorit.

I ka marrë të gjitha vetë, ku në cilësitë e tij njihet për Caruan-ën e Shkencës, njeriun që vetëm plagjiaturist. Plagjiaturon nga ata autorë të cilët nuk ekzistojnë.

Kjo situatë në Akademinë e Shkencave bëhet edhe më e vështirë për faktin se edhe sot keni në rend dite shtimin e anëtarëve të asamblesë Akademisë së Shkencave, dhe z.Gjinushi ka arritur në këto vite, në paligjshmërinë e vetë, të bënte anëtarë të rinj të Akademisë së Shkencave, njerëz që e përkrahin atë, ose njerëz të ish-PS, siç e thotë edhe investigimi i BIRN.

Ish-deputetët e PS janë tashmë akademikë të Asamblesë së Përgjithshme të Akademisë së Shkencave. Një nga akademiket e mban këtë titull sot sepse ka bërë një ligj anti-kushtetues, që e lejonte Gjinushin që të vazhdonte pa dekret në krye të Akademisë.

Mos u çudisni që në mandatin e radhës të Skënder Gjinushit, të kemi akademik edhe Petro Koçin, për shkak se po bën ligjin me porosi për t’i zgjatur dhe për t’i dhënë mandatin e dytë Skënder Gjinushit.

Kjo ishte arsyeja pse unë e mendova të rëndësishme sot, në ditën që mblidhet Asambleja e Akademisë së Shkencave, ne të kërkonim akademikët më shumë shkencë, më shumë ligjshmëri, reflektim mbi ato që kërkon vendi, zërin e akademisë kur bëhet fjalën për koncensionet e Akademisë Kulturore, siç ishte rasti i Butrintit dhe për problemet që ka ky vend, dhe jo kapjen e një akademisë nga një person dhe përdorimin e këtij posti për qëllime të veta personale dhe dhënien parti borxh Edi Ramës për qëllime të tija elektorale.