Ashtu siç e emëroi, Albin Kurti sot shkarkon pa lidhje Këshilltarin Politik
Pas një fortune në gotën e çajit që ngritën sejmenët e Hashim Thaçit kundër Këshilltarit Politik të Kryeministrit në detyrë të Kosovë, si pjesë e fushatës kund Lëvizjes Vetëvendosje dhe qeverisjes së saj, Kryeministri Albin Kurti vendosi ta shkarkoj Shkëlzen Gashin.
“Disa deklarata të djeshme të tij patën pasoja shpërqendruese nga puna e mirë e qeverisë në detyrë. Konsideroj që është më mirë që debatin në të cilin është përfshirë ai të mos e bëjë nga pozita e këshilltarit tim,” tha Kryeministri Albin Kurti duke bërë të ditur përmes rrjetit social Facebook se sot ka takuar dhe më pas e ka liruar nga detyra Këshilltarin Politik, Shkëlzen Gashi.
Ndonëse deklaratat e Shkëlzen Gashit në lidhje me Gjykatën Speciale dhe zbardhjen e krimeve ndaj serbëve nuk janë dhënë dje për herë të parë, siç pretendojnë ata që e linçuan, shkarkimi i një bashkëpunëtori të ngushtë pse këtë e kërkojnë sejmenët e Hashimit nuk ka kurrfarë kuptimi, aq më shumë kur shkarkimi vjen pasi Albin Kurti iu nënshtrua presionit publik!
Ky shkarkim bëhet edhe më i pakuptimt kur dihet se Shkëlzen Gashi u emërua Këshilltar Politik nga Albin Kurti, shumë kohë pasi kishte deklaruar publikisht qëndrimet e tij mbi Gjykatën Speciale ashtu si dhe Kurti; Dallimi i vetëm, por thelbësor ishte se qëndrimet e Albin Kurti dhe Lëvizjes Vetëvendosje prodhuan vota. Dhe, prezenca e një njeriu në Qeveri që mendon ndryshe nga Kryeministri nuk është se e bëri dje Shkëlzen Gashin “të mos jetë bashkëbisedues i lehtë”.
Ndërsa çështja për të cilën folën dje kundërshtarët e Albin Kurtit por jo edhe ditën e emërimit të Shkelzen Gashit, janë thjeshtë një nxitje medatike me urdhër të Hashim Thaçit i cili fatkeqësisht vazhdon dhe drejton të menduarit politik në Kosovë, dhe është arsyeja kryesore pse u themelua Gjykata Speciale në mënyrë aq të paskrupullt.
Trajtimi i luftës së UÇK-së dhe përdorimi i kësaj lufte vazhdon të jetë njëra ndër çështjet kryesore që e ndanë tortën e votave në Kosovë.
Pse e thirri Albin Kurti si Këshilltar Politik, Shkëlzen Gashin, shumë prej tyre militantëve në Vetëvendosje që i bashkon qëndrimi i qartë për Gjykatën Speciale, nuk e kuptuan.
Pse e shkarkoi sot Albin Kurti Këshilltarin Politik, Shkëlzen Gashi, shumë prej tyre e keqkuptuan!
Ja statusi i plotë
Sot e kam takuar dhe më pas e kam liruar nga detyra këshilltarin tim politik, z. Shkëlzen Gashi.
Disa deklarata të djeshme të tij patën pasoja shpërqendruese nga puna e mirë e qeverisë në detyrë. Konsideroj që është më mirë që debatin në të cilin është përfshirë ai të mos e bëjë nga pozita e këshilltarit tim.
E falenderoj për kontributin e dhënë. E çmoj për mendimin kritik. Ka aq shumë gjëra për të cilat pajtohemi në të tashmen, ka edhe të atilla për të cilat nuk pajtohemi nga e kaluara. Z. Gashi nuk është një bashkëbisedues i lehtë. Nga kjo vështirësi kam mësuar.
