ASK: Kosova me 1.586.659 banorë, mosha mesatare 34 vjeç
Kosova ka 1.589.659 banorë, është ky rezultati i procesit të regjistrimit nga Agjencia e Statistikave të Kosovës. Prej tyre 795.046 janë meshkuj dhe 791.614 janë femra. Këto shifra përfshijnë vetëm banorët vendorë dhe jo diasporën. Nga gjithsej 38 komuna të Kosovës, 9 prej tyre kishin rritje të popullsisë, 29 të tjera kishin zvogëlim të numrit të popullsisë.
Mosha mesatare në Kosovë është 34 vjeç. Ka një rritje të moshës për 4.85 vjet, ku në regjistrimin paraprak gjatë vitit 2011 mosha mesatare ishte 29 vjet.
“Vendet e regjionit kanë një moshë mesatare 40 vjet. Për Kosovën kjo është një e mirë dhe është një moment demografik dhe kjo i bie se do ta kemi moshën më të re në Evropë,” tha ushtruesi i detyrës së drejtorit të Agjencisë së Statistikave të Kosovës, Avni Kastrati përgjatë prezantimit të të dhënave të regjistrimit.
Sa i përket piramidës së popullsisë, tashmë dominon mosha 20 deri 24 vjeç, teksa në vitin 2011 dominonte grupmosha 10 – 19vjeç.
Kastrati tha se mbi 99.8 për qind të objekteve të kodifikuara, duke përfshirë edhe të rejat, janë mbuluar në proces. Për periudhën 2011 – 2023, popullsia është shtuar 203.294 banorë duke shkuar në shtim pozitiv. Ndërkaq të dhënat tregojnë se ka rënie të përgjithshme të popullsisë.
Fushë Kosova, Mamusha e Prishtina – komunat me dendësinë më të madhe
“Në 4 komunat në veri të vendit pati bojkotim në masë të madhe, përkundër se është regjistruar një pjesë e popullsisë”, ka thënë ai.
Tri komunat me dendësinë më të madhe dalin të jenë Fushë Kosova me 762 banorë, Mamusha me 513 banorë, Prishtina me 434 banorë. Ndërkaq dendësinë më të vogël e kanë Novobërda, Ranillugu dhe Shtërpca.
Kurti: Regjistrimi i popullsisë – orientim i politikave më të mira
Kryeministri Albin Kurti ka thënë se procesi i regjistrimit të popullsisë ka mundësuar ofrimin e të dhënave, të cilat dërgojnë te orientimi i politikave më të mira për qytetarët.
“Nxjerrja e të dhënave të shumta, të plota dhe të sakta do t’ju mundësojë të gjithë shfrytëzuesve dhe vendimmarrësve duke filluar nga niveli lokal e qendror, por edhe për organizatat donatore e investitorët perspektivë, për orientimin e politikave dhe shërbimeve më të mira për qytetarët,” tha kryeministri Kurti.
Albin Kurti e ka vlerësuar procesin si reflektim të përkushtimit për të kuptuar nevojat e qytetarëve. Ai i ka çmuar bashkëpunimet e Kosovës me organizatat dhe investitorët e huaj, duke theksuar se tashmë kanë të dhëna faktike për të ardhmen.
“Një Agjenci e fuqishme e Statistikës e cila ofron të dhëna të besueshme dhe statistika të azhurnuara është një aset i çmuar për vendin,” tha Albin Kurti.
“Marrë parasysh përvojën e vitit 2011, ASK harmonizoi pyetësorin me rekomandime ndërkombëtare. ASK kërkoi nga institucionet ndërkombëtare në fushën e regjistrimeve që të ketë një vlerësim të pavarur të procesit,” tha Eriona Huruglica nga ASK.
Regjistrimi i Popullsisë zgjati shtatë javë, teksa është regjistrimi i dytë në vend.
Alberit Sopa ka marrë shpërblimin prej 10 mijë euro pasi në lojën shpërblyese ka vlerësuar numrin më të përafërt me numrin e saktë të popullsisë rezidente.
