Asqerë, e ka thënë John Kennedy, jo Sali Berisha!
nga Agim Popoci
Mehraba asqerë! Kaq mjafton të ngrejë zërin Kryeministri Edi Rama edhe në ditë feste, që asqerët e tij të ngarkuar për shkatërrimin e Partisë Demokratike të aktivizohen në rrjetet sociale, meqë elektorat nuk kanë, dhe të fillojnë renditjen e mëkateve të Sali Berishës me itinerar deri në degdisjen e sotme të PD!
Dhe, sikur nuk mungojnë gabimet e këtij njeriu që drejtoi PD-në për 30 vjet, si rrufe në qiell të hapur, Sali Berishën e akuzojnë si bashkëpunëtor të Qeverisë dhe Kryeministrit Edi Rama me një tufë oligarkësh!
Po, po, ky Saliu që sipas tyre i ka marrë të gjitha vendimet nga viti 2013 edhe pse kryetar u zgjodh për tre herë Lulzim Basha me “një anëtar një votë”, pa e përfillur dhe faktin se sot dy të tretat e Grupit Parlamentar që njeh Edi Rama, vjellin vrer kundër Sali Berishës sepse për lider njohin kryetarin e komanduar nga kafexhiu i Lulzim Bashës!
Nënkryetarin e Saliut, jo Edi Rama por nuk e njehë as Lindita Nikolla, dhe ky Grup akuzon “Foltoren” se bashkëpunon me Qeverinë, ndërsa nga ana tjetër vazhdon ta mbajë për Nënkryetar të Parlamentit asqerin e tyre që dha dorëheqje edhe publikisht!
Dhe jo vetëm kaq! Ky Grup akuzon Saliun se bashkëpunon me Edi Ramën ndonëse Nënkryetari i këtij Grupi mori 7 leje ndërtimi nga ky Kryeministër! Dhe, njëri nga Kryetarët e komanduar të degëve ka marrë dhe vazhdon e merr tendera, po nga Edi Rama!
Akuzojnë Saliun se bashkëpunon me Edi Ramën sepse djali i tij na qenka futur me makinë deri tek shkallët e avionit në Aeroportin Nënë Tereza dhe nuk marrin mundimin ta pyesin Qetin e tyre që u jep zyrë pa lekë në Sheraton, si e bëri aksesin VIP të aeroportit; Normalisht, gjithë të tjerët që nuk janë asqerë të Edi Ramës e dinë se ky shërbim ka kohë që është bërë si trau në Rrugën e Kombit, me lekë!
Akuzojnë Saliun se përdori dhe keqpërdori të përndjekurit politik, ndërkohë janë protagonistët kryesor që ndihmuan Edi Ramën për të shpartalluar këtë shtresë, që ishte dhe themeli i Partisë Demokratike. Dhe, sot kur nuk ka radhë qumështi, ka radhë te Ministria e Financave për dëmshpërblimin e të përndjekurve politik, radhë te Autoriteti i Dosjeve për të kuptuar se cili vëlla ose kushëri i ka spiunuar, dhe, radhë te Instituti i të birit të Kurtit për të zhvatur lekë për ndonjë tryezë ose konferencë idiote që sot vetëm Fondacioni Konrad Adenauer jep para, sepse kurrfarë rezultati nuk kanë dhënë.
Për ti vënë qershinë mbi tortë përkatësisht të përndjekurit politikë, jo Saliu por asqerët e Edi Ramës, morën një komuniste nga radhët e çetës “Koha Jonë” dhe e vendosën në krye të Departamentit të Përndjekurve Politik.
Meqë i tronditën themelet e PD, vazhduan me shtyllat e kësaj partie që po shkërmoqet, pronarët që komunistët i lanë pa pronë! Çdo dy orë, asqerët e Edi Ramës akuzojnë Saliun për Ligjin 7501, të cilin e miratuan komunistët, ndërkohë pronarëve të cilët Rama edhe sot u merr pronat me Aktet normative të miratuara nga po Grup, i lënë të presin si qenë sa për legalizim aq dhe kompensim të pronave të tyre të ligjshme dhe patjetër, me sytë nga IKMT nëse nuk japin ryshfet!
Por asqerët e Edi Ramës në shërbim për shpartallimin e radhëve të Partisë Demokratike nuk mjaftohen me kaq! U rebeluan duke thënë se rrugët me Saliun ndahen sepse ai është antiamerikan, por në momentin kur u votua kampioni i antikorrupsionit që është shpallur nga SHBA, për anëtar të Gjykatës Kushtetuese, ata braktisën seancën; Dhe, e lanë kampionin me medalje amerikane në dorë, si dhe pa postin më të lartë në drejtësinë shqiptare!
Këtu shqiptarët u gajazën ndonëse po shikonin seancë plenare të Parlamentit të Shqipërisë. Dëgjuan nga kafexhiu i Lulzim Bashës se Edi Rama për ta votuar kampionin amerikan të antikorrupsionit kishte dërguar oligarkë për negociata, kur dihet se këto janë negociata për Reformën në Drejtësi dhe mbulohen nga specialistja e barit dhe kashtës ndërsa Samir Mane dhe Salillari kanë për interkonjeksion Kunatin!
Në fund, në pritje të vendimit të formës së prerë nga Gjykata e Apelit, në mënyrë që Saliun ta lënë edhe pa vulën e Partisë Demokratike meqë elektoratin demokrat nuk po ia marrin dot, akuzuan demokratët pse shkojnë në përvjetorin e partisë, të veshur mirë, ndërsa ata në përvjetorin e tyre paralel ndonëse parti e djathtë ishin veshur si pabuksa!
Që ishin veshur ashtu, kjo është e vërtetë, por, kur je deputet i një partie që të financon Kunati gjithçka mund të jesh, por, pabuks jo! Pra, parti pa elektorat, siç janë, mund të jenë dhe me pantallona të grisur, por, meqë nuk ja kanë idenë nga politika por njohin vetëm interesat personale, harrojnë që pantallonat e grisur me xhepat plotë, nuk sjellin vota.
Dhe, për këtë nuk kanë pse e akuzojnë Saliun ndonëse nuk i ndalojnë vjelljet kundër tij në Facebook dhe refuzohen nga shumica e demokratëve ndërsa vazhdojnë të qëndrojnë në politikë.
Por, asqer i Edi Ramës, kujdes, mund ta presësh vendimin e Gjykatës së Apelit, por mos harro, shumë kohë më parë, këtë nuk e ka thënë Sali Berisha por Presidenti i SHBA, John F. Kennedy, kur nuk kishte as Facebook, as Twitter por respektohej Krishtlindja e çdo festë, dhe, gjithmonë kishte elektorat:
“Nëse hyni në një dhomë ku ka disa dhjetra të huaj dhe pas 5 sekondash nuk mund të përcaktosh se cili prej tyre do të votojë për ty dhe kush është kundër, nuk ke vend në politikë.”
