AstraZeneca aplikon për autorizimin e vaksinës nga BE

AstraZeneca aplikoi pranë Bashkimit Evropian për autorizimin e vaksinës kundër COVID-19, që kjo kompani farmaceutike britanike e ka zhvilluar në bashkëpunim me Universitetin e Oxfordit.

Agjencia Evropiane e Barnave, EMA, tha sot se opinionin për autorizim të kushtëzuar të vaksinës mund ta lëshojë deri më 29 janar.

Nëse miratohet nga EMA dhe aprovohet zyrtarisht nga Komisioni Evropian, ajo do të bëhet vaksina e tretë kundër COVID-19, që do të jetë e disponueshme në vendet e BE-së, raporton RFE.

Dy vaksinat e miratuara deri më tani janë Pfizer/BioNTech dhe Moderna.

Presidentja e Komisionit Evropian, Ursula von der Leyen, tha se aplikimi i AstraZenecas është një lajm i mirë.

“Sapo vaksina të marrë një opinion pozitiv shkencor, ne do të punojmë me shpejtësi të plotë për ta autorizuar përdorimin e saj në Evropë,” tha përmes rrjetit social Twitter, Ursula von der Leyen.