Ata që vrasin/ Dom Artur Jaku: Mund ti shpëtojnë policisë por jo Zotit!

“Për hatër të Zotit mos me vrasje, mos me dhunë. Mos të harrojmë se ne mundemi ti shpëtojmë policisë, gjykatave e shtetit por nuk mund t’i shpëtojmë Zotit.” Ky është apeli i klerikut të Shkodrës, Dom Artur Jakut nga mesha me rastin e 2 vjetorit të shenjtërimit të Nene Terezës, për ata që vrasin, e për qeverinë, shton ai, nuk ka apel ajo do të gjykohet ditën e votimeve.

“Sot nuk kam apel për qeverinë sepse ajo e ka ditën kur do të gjykohet, ditën e votimeve, por sot kam për ata që vrasin. Për hatër të Zotit mos me vrasje, mos me dhunë. Mos të harrojmë se ne mundemi ti shpëtojmë policisë, gjykatave e shtetit por nuk mund t’i shpëtojmë Zotit. Nëse ne vrasim nuk mund t’i fshihemi Zotit. Nuk mund t’i ikim gjykimit të tij që sheh e vlerëson gjithçka. Ju bëj thirrje, kthehuni nga Zoti sa nuk është vonë”

Sipas Dom Artur Jakut, Shkodra dhe vendi jonë, janë në këtë gjendje sepe nuk jemi të aftë për të reaguar:

“Sot edhe në vendin tonë, edhe në Shkodrën ku jetojmë jeta nuk vlen as dy lekë. Për hatër të Zotit mjaft me vrasje. Për hatër të Zotit mjaft me terror, dhunë e korrupsion. Sepse vendi jonë dhe Shkodra gjendet e varfër është dhe për arsye se ne nuk jemi të aftë për të reaguar”

Kremtimi  i meshës së shenjtë u bë në qendrën e Nënë Terezës, para misionarëve që  prej 25 vitesh shërbejnë në Shkoder.