Atentat me lëndë plasëse në Tiranë, Lleshaj: Policia dështoi…
Një shpërthim i fuqishëm ka ndodhur mbrëmjen e sotme rreth orës 19:00 tek zona e Ish-NSHRAK-ut në Tiranë. Shumë shpejtë u konfirmua se një lëndë plasëse me telekomandim iu vendos një automjeti me drejtues, Preng Gjinin, vëllai i të ekzekutuarit një vit më parë në qendër të Rrëshenit, i është bërë atentat me telekomandë.
Policia ka dhënë detaje rreth ngjarjes ndërkohë Ministri i Brendshëm, Sandër Lleshaj, e ka pranuar se policia e shtetit ka dështuar në parandalimin e atentatit me tritol në Tiranë.
Makina e tij ka shpërthyer, si dhe janë dëmtuar edhe makina të tjera që kanë qenë duke udhëtuar. Sikurse shihet edhe nga foto makinat ndodhen ende në vendngjarje, ndërsa ekspertiza është duke mbledhur provat e nevojshme për zbardhjen e ngjarjes.
Gjendja e Preng Gjinit paraqitet e rëndë, por drejtori i spitalit të Traumës thotë gjendja e tij po përmirësohet dhe është më mirë se sa kur mbërriti në spital; Ndërkohë të plagosur kanë mbetur një 14 vjeçar dhe një shtetas italian, kalimtar të rastit.
Nuk vonoi shumë dhe Drejtori i Policisë së Tiranës, Rebani Jaupi, në një prononcim për mediat dha informacionin zyrtar për shpërthimin e fuqishëm në Tiranë, duke konfirmuar se makina e Preng Gjinit u hodh në erë me lëndë plasëse.
Rebani Jaupi: Makina e Preng Gjinit u hodh në erë për hakmarrje
Drejtori i Policisë së Tiranës, Rebani Jaupi u shpreh se ka dyshime të forta që kjo ngjarje të ketë ndodhur për hakmarrje.
“Në orën 19:00 sapo mjeti është futur në urë me drejtues Preng Gjinin ka ndodhur një shpërthim që dyshohet me lëndë plasëse. Është ngritur grupi hetimor me specialistë të Krimeve të Rënda nën drejtimin e policisë kriminale në bashkëpunim edhe me një qark tjetër ku po kryejmë hetime. Po hetojmë në vendin e ngjarjes për të përcaktuar llojin e lëndës shpërthyese. Kemi ngritur edhe pistat e hetimit për të cilat dyshojmë që ka ndodhur kjo ngjarje. Ka pista për një hakmarrje midis personit që është dëmtuar dhe disa qytetarëve të tjerë jashtë Tiranës,” tha Jaupaj.
Ndryshe nga Drejtori i Policisë së Tiranës, Rebani Jaupi, Ministri i Brendshëm, Sandër Lleshaj, e ka pranuar mbrëmjen e sotme se policia e shtetit ka dështuar në parandalimin e atentatit me tritol në Tiranë.
“Duhet ta pranojmë se policia e shtetit ka dështuar në parandalimin e kësaj ngjarje. Këto janë ngjarje që kanë një parahistori. Është iluzore të pretendojmë se do të parandalojmë të tilla gjëra se do ishim i vetmi vend në botë që do e bënte këtë,” tha Lleshaj ndërsa i pyetur nëse ka grupe të strukturuara kriminale në Shqipëri që kryejnë vrasje me lëndë plasëse ministri ai shtoi:
“Sigurisht që këto grupe kanë mjetet e tyre, eksplozivet janë një nga këto. Grupet kanë ekzistuar , janë rralluar sepse janë ndëshkuar, por nuk përjashtoj ekzistencën e celulave të tilla. Kemi 330 raste armësh të kapura, çështja është që të vendosim gjithë mekanizmat që të minimizojmë veprimtarinë e tyre.”
Por Ministri Lleshaj e pranoi gjatë një emisioni në TCH se policia gaboi në moment të fundit në zbulimin e atentatorit të vrasjes së Kastriot Reçit, megjithëse më herët kishin deklaruar se ishin afër zbardhjes së ngjarjes.
Kastriot Reçi është midis pesë të vrarëve nga konfliktet midis dy familjeve në Rrëshen, ngjarje të ndodhura për hakmarrje. Edhe atentati i sotëm dyshohet të ketë lidhje me këto ngjarje.
