Atentati në Vlorë/ Krimi po vret Shqipërinë, Basha: Rama pëllet i tmerruar se duan t’i marrin karriken!

Kryetari i Partisë Demokratike, Lulzim Basha ka reaguar pas atentatit të pasdites me tritol në Vlorë, ku një person mbeti i plagosur rëndë duke theksuar se në një kohë kur krimi po vret Shqipërinë, Edi Rama pëllet i tmerruar se duan t’i marrin karriken, tepsinë, paratë e vjedhura

“Rama sulmon si i lajthitur të gjithë ata që mendon se po i rrezikojnë paratë dhe burgos edhe fëmijët dhe nënat që luftojnë për të mbrojtur shtëpitë e tyre,” thekson Lulzim Basha përmes rrjetit social duke shtuar se për Edi Ramën kriminelë janë ata që i kërcënojnë tepsinë.

“Shikojeni si pëllet i tmerruar se duan t’i marrin karriken, tepsinë, paratë e vjedhura. U merr shtëpitë njerëzve të dëshpëruar, por ulërin si i çmendur se duan t’i marrin karriken. Hajdut dhe i çmendur.”

Ja postimi i plotë:

Kur i gjithë shteti dhe policia janë vërsulur të nxjerrin banorët nga shtëpitë e tyre për vjedhjen 40 milionë Euro të Edi Ramës te Unaza, qytetet e Shqipërisë qeverisen nga krimi. Përsëri atentat me tritol dhe përleshje me armë sonte në Vlorë, në vazhdën e atentateve dhe përplasjeve mafioze që kanë përpirë gjithë vendin në Tiranë, Shkodër, Durrës, Elbasan dhe kudo.

Ndërsa Edi Rama sulmon si i lajthitur të gjithë ata që mendon se po i rrezikojnë paratë dhe burgos edhe fëmijët dhe nënat që luftojnë për të mbrojtur shtëpitë e tyre, krimi po vret Shqipërinë.

Sepse për Edi Ramën kriminelë janë ata që i kërcënojnë tepsinë. Shikojeni si pëllet i tmerruar se duan t’i marrin karriken, tepsinë, paratë e vjedhura. U merr shtëpitë njerëzve të dëshpëruar, por ulërin si i çmendur se duan t’i marrin karriken. Hajdut dhe i çmendur!”