Aty ku do të ndërtohen 500 shtëpi/ Me Ramën, ministri turk: Ti zgjerojmë rrugët!

Pas firmosjes së Marrëveshjes për ndërtimin e 500 shtëpive nga Turqia, Kryeministri Edi Rama dhe Ministri turk i Mjedisit, Murat Kurum vizituan banorët e Laçit, të cilët u goditën rëndë nga tërmeti shkatërrimtar i 26 nëntorit dhe zonën ku do të ndërtohen shtëpi për banorët e prekur nga tërmeti, ku ministri Kurum tha se do të ishte mirë ti zgjeronin rrugët ndërsa vërejti se niveli i bazamentit të rrugës është pak më lart se përroi i vogël gjë të cilën banorët e zonës e vuajnë me përmbytje të shpeshta.

Ministri turk ka kërkuar nga Kryeministri Edi Rama dhe shpreson se deri në fund të Janarit autoritetet shqiptare do t’ju dorëzojnë truallin ku do të bëhet ndërtimi ndërsa premtoi se do të jetë një lagje shembullore, dhe ndërtimi do të përshtatet me arkitekturën dhe traditën shqiptare.

Firmoset marrëveshja, 500 shtëpi në Laç për të prekurit nga tërmeti

Sot është firmosur marrëveshja për ndërtimin e 500 shtëpive të reja, të cilat ishin premtuar nga qeveria e Turqisë pas tërmetit shkatërrimtar të 26 nëntorit 2019.

Në një konferencë të përbashkët, Kryeministri Edi Rama para ministrit turk Murat Kurum tha se këto shtëpi të reja me porosi te Presidentit Erdogan do të ndërtohen në Laç.

“Siç është bërë e ditur dje gjatë një konference për shtyp tani jemi në fazën e dytë të këtij projekti dhe kemi ardhur në fazën e nënshkrimit të këtij bashkëpunimi. Janë 500 njësi të reja banimi që do ndërtohen nga miqtë e ardhur nga Turqia me porosi të presidentit Erdogan në zonën e Laçit që njerëzit të kthehen në shtëpi më të mira se ato që kanë pasur.

Ky është zëvendësimi i godinave të rrënuara dhe do të jetë një transformim i rëndësishëm i gjithë situatës urbane. Agjencia e angazhuar për këto 500 njësi, do vazhdojmë me një plan zhvillimi për të gjithë infrastrukturën. I japim zgjidhje edhe përmbytjeve në zonën e Laçit.

Të dyja palët do ndajnë punën dhe në një kohë të shkurtër do krijojmë në shembull.  E falenderoj me shumë mirënjohje ministrin dhe gjithë delegacionin që ka ardhur bashkë me të dhe përfaqësues të specializuar në programin e ndërtimeve me karakter social në Turqi”, tha Edi Rama.

“Ju kam sjellë përshëndetjet e përzemërta të Presidentit Erdogan. Ne i ndodhemi sa më pranë vëllezërve tanë shqiptarë. Ekipet tona erdhën dhe bënë përpjekje për të ndihmuar sa më shumë njerëz. Ekipet tona kanë verifikuar në terren 600 njësi dhe kemi ofruar ndihma të veçanta. Më pas presidenti Erdogan dha porosi për të ndërtuar 500 banesa të reja. Jemi këtu në kuadër të këtij procesi dhe deri në fund të Janarit autoritetet shqiptare të na dorëzojnë truallin ku do të bëhet ndërtimi,” tha ministri turk duke premtuar”

“Do të jetë një lagje shembullore, dhe ndërtimi do të përshtatet me arkitekturën dhe traditën shqiptare. Ne do firmosim protokollin e parë për realizimin e këtij projekti dhe jemi të gatshëm për t’i ardhur në ndihmë Shqipërisë edhe në çështje të tjera. Ato që ne kemi bërë deri tani do vazhdojmë të bëjmë edhe në të ardhmen në kuadër të marrëdhënieve vëllazërore mes dy vendeve.”

Ministri Kurum kërkon sa më shpejtë të fillon puna

Kurum: Do ishte mirë që rrugën, arteriet kryesore, t’i zgjeronim, ose t’i linim më të gjera që tani.

Rama: Ne duhet të ndërhyjmë, ato godinat atje janë shumë problematike, janë ndërtuar në vitet 1980, plus spitali në krahun tjetër. Kështu që ne do duhet të ndërhyjmë edhe në krahun tjetër, ndaj është shumë e drejtë ajo që thoni. Ndaj e nënvizova që na duhet asistenca e inxhinierëve tuaj për një zgjidhje të shpejtë të çështjes së kolektorit kryesor, në mënyrë që ne ta përfshijmë në fodin që do angazhojmë për këtë strukturë.

Kurum: A mund të na e dorëzoni shpejt atë sheshin e ndërtimit?

Rama: Po, brenda javës e kemi gati.

Kurum: Niveli i bazamentit të rrugës është pak më lart se përroi i vogël. Duhet të diskutoni me bashkinë, nëse ka rrugë të re për t’u hapur, që të përshtasim edhe masterplanin.

Rama: Është bërë një parashikim që të shfrytëzohet pjesa nëntokësore për të bërë nivelimin e rrugës.