Atyre që filluan festën, Yuri Kim: Kam 3 vite në Shqipëri, do jem këtu edhe për ca më gjatë!
“Konsolidimi i Këshillit të Lartë Gjyqësor” ishte qëllimi i prezencës së Ambasadores së Shteteve të Bashkuara, Yuri Kim, në këtë konferencë, por, ajo kishte një mesazh të qartë për të gjithë ata që iu gëzuan procedurave që kishte nisur Ministria për Europën dhe Punët e Jashtme e Olta Xhaçkës për zëvendësimin e saj dhe kishin filluar festën, se ka 3 vite në Shqipëri dhe do të jetë këtu edhe për ca më gjatë.
“Vazhdoni të ecni sa më shpejt të mundeni. Kjo është një kohë vendimtare për reformën në drejtësi dhe ka arsye për të qenë optimistë për këtë brez shqiptarësh. Reforma në drejtësi po jep rezultate të dukshme, të prekshme, konkrete. Por e dini çfarë, njerëzit duan më shumë dhe SHBA-të janë në kahun e popullit shqiptar. Ne biem dakord me ta, duhet të ketë më shumë.
Kjo nuk është kohë për t’u çlodhur. Ne duhet të festojmë për përparimin që kemi bërë së bashku deri tani. E kemi bërë së bashku, e kemi realizuar së bashku. Ndonjëherë ka qenë e vështirë, nuk mendoj se ka pasur ndonjë kohë kur ka qenë e lehtë, ndonjëherë ka pasur gabime, por kjo është në rregull, ky është një proces njerëzor,” tha Yuri Kim e vendosur për ta çuar deri në fund misionin e saj të reformës në drejtësi:
“Çelësi është që mbetemi të angazhuar ndaj synimit, në mënyrë të sinqertë, në mënyrë serioze që ta dini se SHBA-të nuk do të ndalojnë, as ju nuk duhet. Që partnerët europianë duan që ju të keni sukses po aq sa duan dhe partnerët amerikanë që ju mund të ia dilni mbanë.”
Deri sot ka heshtur, por sot Ambasadorja amerikane Yuri Kim kishte një mesazh për të gjithë ata që i besuan shpurrës së Edi Ramës se ka fuqinë e të madhit Zot, dhe emëron dhe shkarkon edhe ambasadorët e shtetit më të fuqishëm në botë:
“Unë kam 3 vite në Shqipëri dhe do të jem këtu edhe për ca më gjatë. Por kjo është ajo që kam mësuar gjatë këtyre 3 viteve të mia këtu, që ka një sfidë të madhe këtu, kjo nuk ndodh sepse Shqipëria është unike, është në mënyrë unikale e keqe, në mënyrë unikale e korruptuar, jo.
Por ka histori këtu dhe duhet të ndiejmë empati dhe respekt për historinë nëpër të cilën ka kaluar ky vend, për përvojën e popullit shqiptar. Dhe gjithashtu sfidat me të cilat ku vend përballet. Ky është një vend i vogël, të gjithë njohin të gjithë të tjerët.”
Ndërkohë Ambasadorja e SHBA në Tiranë, Yuri Kim, kishte sot dhe një mesazh shumëdomethënës për KLGJ-në, gjyqtarët pjesëmarrës në konferencën “Konsolidimi i Këshillit të Lartë Gjyqësor” dhe jo vetëm:
“Drejtësia e vonuar është drejtësi e mohuar, ndaj ne duhet t’i japim drejtësi. Plotësoni gjykatën, duhet t’i jepni përparësi çështjeve emergjente!”
