Audio-përgjimi/ Sikur Tahiri dhe Balla, Reagon Biba duke kujtuar se është Baba me fëmijë dhe…
Pas publikimit të bisedës mes Denar Bibës dhe Ledi Biankut, ku kërkohet bllokimi i cështjeve të pronave nga ana e gjyqtarit shqiptar në Strasburg, për llogari të qeverisë së Edi Ramës, ka reaguar Ish-kryetari i KQZ-së ku e pranon se ka takuar Biankon, por sipas tij, është e pamundur që të shantazhohej dikush që nuk kishte gjë në dorë.
“Nuk ka qenë ndërhyrje e paligjshme, mjafton të dalë biseda e plotë e pacensuruar,” thotë Biba dhe ashtu si Saimir Tahiri dhe Taulant Ball kujtoi se ishte serioz, Baba me femijë që kanë luajtur me fëmijët e Biankut.
“Jam i ofenduar nga gjithë kjo që po ndodh, se si një bisedë mes 2 miqsh, pedagog-student, është copëtuar, për t’u paraqitur në këtë mënyrë për qëllime politike. Me Biankun më lidh histori e gjatë, e kam pasur pedagog, më ka ardhur në shtëpi, i kam shkuar në shtëpi, kemi dalë me fëmijët e njëri-tjetrit.”
Ish-kryetari i KQZ ka sqaruar takimin me Biankun në Strasburg.
“Më ka pyetur, e kam pyetur për punën e tij, i kam kërkuar mendim. I thashë me kërkesë të Agaçit, bashkë me Peleshin për këtë kërkesë. Është e pamundur që të shantazhohej dikush që nuk kishte gjë në dorë. Nuk ka qenë ndërhyrje e paligjshme, mjafton të dalë biseda e plotë e pacensuruar.”
Ai tha se ishte thirrur nga Sekretari i Përgjithshëm i kryeministrisë, Engjëll Agaçi, është vendosur të shkojë si ekspert i Kushtetueses sëbashku me zv.kryeministrin Niko Peleshi për të kërkuar shtyrjen e pagesës së të shpronësuarve.
“Më ka thirrur sekretari i përgjithshëm, Engjëll Agaci, dhe si ekspert i Kushtetueses të asistoj zv.kryeministrin Niko Peleshi, me njohuritë tona, me një grup zyrtar për të kërkuar publikisht shtyrjen e afatit të shtetit shqiptar për të paguar menjëherë një shumë të konsiderueshme parash për pronarët që ishin shpronësuar. Shteti shqiptar do kërkonte një shtyrje të dytë, me këtë cilësi kemi qenë atje. Në kafenenë e Gjykatës kam takuar mikun tim të ngushtë Ledi Bianku. Në atë bisedë fare miqësore, as që bëhet fjalë për shantazhe, është manipulim. Ai është i pashantazhueshëm, sepse ai nuk kishte gjë në dorë, jo më për marrëdhënien tonë që është e paimagjinueshme një gjë e tillë,” tha Biba duke u kthyer në fund në identitet, atë komunist.
“Habitem me këtë dembelizëm të opozitës që ngre furtuna të tilla e nuk mundohet ta gjejë të plotë atë audio-përgjim, e aty të dalë se çfarë kemi folur me njëri-tjetrin, bisedë normale miqsh. Nuk e kuptoj kush përfiton nga kjo gjë. As opozita nuk fiton gjë. Ndoshta i shtyhet dhe pak muaj mandati i mikut tim Biankut në detyrë, ndoshta kërkohet të hidhet baltë mbi postin tim prej nënkryetari të KQZ, në prag zgjedhjesh pas disa muajsh. Nuk kam dëshirë të bëhem pjesë e hallit të opozitës. E neveris të gjithë këtë që ka ndodhur,” përfundoi Denar Biba.
