“AUSA 2024”, Komandanti i FSK-së takim me Shefin e Shtabit të Ushtrisë Amerikane

Bashkëpunimi mes dy ushtrive, stërvitjet si dhe aktivitetet e tjera të përbashkëta, ishin çështje që u diskutuan në takimin e Komandantit të Forcës së Sigurisë së Kosovës, Gjeneralejtnant Bashkim Jashari me Shefin e Shtabit të Ushtrisë Amerikane, Gjeneral Randy A. George.

“Fillimisht, Gjeneral Jashari u takua me Shefin e Shtabit të Ushtrisë Amerikane, Gjeneral Randy A. George, ku u diskutua lidhur me bashkëpunimin bilateral mes dy ushtrive, stërvitjet e përbashkëta si dhe aktivitetet e tjera të përbashkëta. Gjeneral Jashari falënderoi Gjeneralin George për mbështetjen e vazhdueshme si dhe shprehu gatishmërinë për bashkëpunim të mëtutjeshëm,” thekson FSK përmes një njoftimi ndërsa bëhet e ditur se Gjeneral Jashari ka takuar dhe Komandantin e Komandës së Asistencës Ushtarake të Ushtrisë Amerikane, Gjeneral Brigade Allan J. Pepper, me të cilin ka diskutuar lidhur me asistencën në projektet e sistemeve të armatimit, pakot e trajnimit si dhe fusha tjera përkatëse.

“Përveç pjesëmarrjes në sesionet kryesore të konferencës dhe panairit, Gjeneral Jashari gjithashtu u takua me përfaqësuesit e disa prej agjencive kyçe të mbrojtjes me fokus të veçantë rreth bashkëpunimit bilateral në fushën e mbrojtjes. Po ashtu, u njoftua me zhvillimet më të fundit teknologjike, përmes prezantimeve informuese dhe paneleve të diskutimit mbi fushën e mbrojtjes dhe sigurisë”.

Në këto aktivitete, sipas FSK-së, gjenerali i Ushtrisë së Kosovës ka theksuar rëndësinë e mundësinë e shkëlqyer që ka pjesëmarrja në këtë aktivitet ndërkombëtar për të vlerësuar faktin që krahas ndryshimit të kontekstit gjeopolitik, avancimit të teknologjisë ushtarake dhe avancimit të bashkëpunimit me shtetet aleate.

Ndryshe, Komandant i FSK, Gjeneralejtnant Bashkim Jashari po qëndron në SHBA me ftesë të Asociacionit të Ushtrisë së Shteteve të Bashkuara ku mori pjesë në Konferencën Vjetore dhe Panairin e Industrisë së Mbrojtjes “AUSA 2024” në Washington D.C, SHBA.

Kjo vizitë po konsiderohet e rëndësishme në procesin e zhvillimit të Forcës së Sigurisë së Kosovës, tani kur Forca e Kosovës po hyn në fazën përfundimtare të procesit të tranzicionit, thuhet në njoftimin e FSK duke përfunduar:

“Gjithashtu, kjo vizitë shprehu rëndësinë e partneritetin tonë shumë të ngushtë me SHBA-në në fushën e sigurisë dhe mbrojtjes!”