Australi, policia gjen pesë trupa të pajetë brenda një shtëpie

Pesë trupa të pajetë janë gjetur brenda një shtëpie në periferi të Perth, ka njoftuar policia në Australi, raporton RFE.

Në mesin e të vdekurve ka gra dhe fëmijë. Ndimës komisioneri, Paul Steele tha se ky ishte një incident “tragjik”, por nuk ka shqetësime të vazhdueshme për sigurinë, raporton BBC.

Ende nuk është bërë e ditur nëse viktimat kanë lidhje familjare ndërkohë policia ka arrestuar një person 20-vjeç. .

Stele tha se policia dhe prokurorët janë në vendin e ngjarjes në përpjekje për të zbuluar se si ka ndodhur ngjarja.

Në korrik, një 19-vjeçar ishte akuzuar për vrasjen e dy fëmijëve dhe nënës së tyre. Kjo ngjarje po ashtu kishe ndodhur në periferi të Perthit.

Vetëm dy muaj para kësaj, shtatë persona ishin gjetur të vdekur në një pronë në zonën rurale të qytetit Osmington, që gjendet 280 kilometra në jug të Perthit.

Kjo ishte konsideruar si ngjarja më e rëndë që prej vitit 1996. Policia e kishte trajtuar këtë rast si vrasje dhe vetëvrasje, duke thënë se Peter Miles kishte vrarë gjashtë të afërmit e tij dhe më pas vetën.