Austri, ura për këmbësorë shembet mbi kamion, dy të plagosur rëndë

Një urë për këmbësorë u shemb sot mbi një kamion në qytetin austriak, Linz, ku për pasojë mbetën të plagosur rëndë dy persona.

Sipas zëdhënësit të policisë, operacioni i shpëtimit të dy personave që ishin në kabinën e kamionit zgjati disa orë, raporton Agjencia e lajmeve APA.

Kamioni kishte një rimorkio me vinç. Gjatë përpjekjes së shoferit që të futej në një parking nëntokësorë, kamioni goditi urën, e cila u shemb direkt mbi kabinë. Askush nuk ishte në urë në momentin e aksidentit, raportoi gazeta rajonale Die Oberösterreichische Nachrichten.

Ndryshe, zjarrfikësit vlerësuan se pjesa e shembur e urës peshonte midis 30 dhe 40 tonë.