Austria me Kancelar!
Lideri i Partisë Popullore Austriake, OVP, Christian Stocker, u bë sot kancelari i ri, i pari që nga Lufta e Dytë Botërore që drejton një koalicion trepartiak. Stocker u betua në një ceremoni të organizuar nga Presidenti i Austrisë, Alexander Van der Bellen. Ministrat e qeverisë do ta bëjnë betimin më vonë.
Sipas marrëveshjes së koalicionit, OVP do të drejtojë ministrinë e brendshme, socialdemokratët ministritë e financave dhe drejtësisë dhe liberali Neos ministrinë e jashtme.
Të tre partitë arritën një marrëveshje të papritur që anashkaloi Partinë e Lirisë së ekstremit të djathtë, FPO, që është fituesja e zgjedhjeve parlamentare që u zhvilluan shtatorin e kaluar dhe rezultuan në pesë muaj negociata koalicioni të pasuksesshme.
“Kancelar pa përvojë ministrore”
Stocker bëhet kancelar si një politikan pa përvojë ministrore, një zyrtar partie që i afrohet moshës së pensionit dhe kryesisht i panjohur jashtë qarqeve politike. “Kancelar i panjohur (pothuajse)”, është titulli i medias austriake Kronen Zeitung, e cila profilizoi Stockerin.
Politikani 64-vjeçar mori drejtimin e OVP-së pasi kryetari i mëparshëm i partisë nuk arriti të formonte një qeveri, dhe më pas dështoi edhe FPO. Ai është një avokat, i konsideruar si zyrtar pragmatik, i cili i ka vënë vetes si qëllim që të shmangë marrjen e Austrisë nga lidershipi euroskeptik, pro-rus, siç konsiderohet ai i FPO-së.
Ishte Sekretar i Përgjithshëm i partisë
Stocker ishte Sekretari i Përgjithshëm i partisë kur ajo drejtohej nga ish-kancelari Karl Nehammer, i cili u largua nga posti në janar pasi dështoi të formonte një koalicion të qendrës.
Për gazetën austriake Die Presse ai tha se nuk e kishte ndërmend të merrte partinë pas largimit të kancelarit. “Ditën e atij vendimi, unë shkova në Vjenë me xhinse dhe një xhup,” tha ai. “Disa orë më vonë u detyrova të kërkoja të më sillnin një kostum dhe kravatë.”
Në atë kohë Stocker u emërua udhëheqës i përkohshëm, por pasi përpjekja e liderit të Partisë Lirisë, Herbert Kickl, për të formuar një qeveri gjithashtu dështoi, ai mbeti kandidati i fundit me një shans për të formuar një qeveri. Ai ia doli ta bëjë këtë të enjten e kaluar kur Stocker, udhëheqja e Social Demokratëve dhe Neos arritën një marrëveshje.
Kjo është qeveria e parë austriake e përbërë nga tre parti që nga fundi i viteve 1940. Kjo aleancë e pamundur u krijua në një valë rezistence ndaj FPO, por duket se Stocker tani për tani po balancon me sukses midis interesave të ndryshme partiake.
Zgjedhjet e ardhshme austriake janë planifikuar të mbahen në vitin 2029.
