Austria sot fillon kryesimin e BE

Austria sot fillon kryesimin gjashtëmujor të Bashkimit Evropian, me premtimin se do të mbrojë më mirë kufijt e jashtëm të 28 shteteve.

Në ceremoninë e zhvilluar dje në Alpe afër Schladmingut, kur mori kryesimin nga Bullgaria, kancelari austriak Sebastian Kurz tha se ky kryesim është “nder por dhe përgjegjësi e madhe” për Austrinë, thekson Associated Press.

Në ceremoni, thekson Blumberg, kryeministri bullgar Bojko Borisov i dorëzoi kryesimin, ku ishte prezent edhe Presidenti i Këshillit Evropian , Donald Tusk vetëm një ditë pasi liderët e BE në samitin e Brukselit arritën marrëveshjen për emigrantët.
Kurz tha se roli i tij në gjashtë muajt e ardhshëm është që të ndihmoj në uljen e tensioneve në BE, ndërsa vlerësoi se klima ndërkombëtarer aktualisht nuk është e mirë.

“Dëshirojmë të shfrytëzojmë këta gjashtë muaj që të ndërtojmë ura në BE dhe të ulim tensionet. Jemi të përqëndruar edhe në ndërtimin e Evropës e cila mbronë, që është edhe motoja e kryesimit tonë,” tha Kurz.

Tusk komplimentoi moton e kryesimit austriak ”Evropa e cila mbronë” dhe shtoi se nevoja për siguri është bërë evidente gjatë krizës së emigrantëve. Evropianët, tha ai, presin që liderët e tyre të tregojnë vendosmëri në vendosjen e ndjenjës së rendit dhe sigurisë.
“Jo pse përnjëherë u bënë ksenofobik dhe dëshirojnë që të ngrisin mure ndaj pjesës tjetër të botës, por sepse është detyrë e çdo pushteti që të zbatoj ligjet dhe të mbrojë territorin dhe kufirin,” tha Tusk.
Kryesimi i mundëson Austrisë që të drejtoj mbledhjet dhe të përcaktoj prioritetet derisa BE lufton me ardhjen e emigrantëve, me menaxhimin e kufijve dhe çështjet tjera, duke përfshirë këtu dhe Brexitin

Kurz erdhi në krye të qeverisë pas premtimit parazgjedhor se do të kufizoj ardhjen e emigrantëve në Austri, e pikërisht kjo çështje do të jetë në krye të prioriteteve të koalicionit të tij të djathtë qeverisës, gjatë kryesimit të BE.

Përveç emigracionit, ndër prioritetet e kryesimit austriak do të jenë edhe negociatat rreth buxhetit të BE dhe përparimi në zgjerimin e Bashkimit Evropian tek vendet e Ballkanit Perëndimor, thekson Frans pres.
Mirëpo, pritet që Austria do ta ketë vështirë të arrijë rezultate të prekshme, si për shkak të fillimit të fushatës për zgjedhjet evropiane që mbahen në majin e vitit 2019, ashtu dhe negociatave të vështira me Britaninë e Madhe mbi Brexitin, në prag të daljes nga BE në muajin mars të vitit të ardhshëm.