Autorët e vjedhjes Ilir Beqja dhe Edi Rama, Berisha: Të ngrihemi, të largojmë këtë organizatë kriminale

Edhe pas vendimit të Gjykatës së Posaçme Kundër Korrupsionit dhe Krimit të Organizuar për të lënë në fuqi masat ekzistuese të sigurisë për ish-zv.ministrin e Shëndetësisë, Klodian Rjepaj, biznesmenin, Ilir Rrapaj, dhe 6 personat e tjerë të akuzuar për shpërdorim detyre dhe mashtrim në rastin e koncesionit të sterilizimit, Kryetari i Partisë Demokratike, Sali Berisha, vlerëson se autorët kryesorë të vjedhjes së dytë të shekullit janë Ilir Beqja dhe Edi Rama.

Sot në konferencën e përjavshme, Kryetari i Partisë Demokratike tha se vjedhjet në koncesionet në shëndetësi shkojnë deri në 1 miliard euro, dhe duke vlerësuar se drejtësia po vepron me regji, u bëri thirrje qytetarëve të ngrihen për të larguar këtë organizatë kriminale

“Koncesionet në shëndetësi janë në të gjitha aspektet vjedhja e dytë më e madhe e shekullit. Fatura e tyre minimale, e përcaktuar si faturë dysheme në kontrata, për 10 vite, shkon në 450 milionë euro.

Por, sipas zbatimit dhe vjedhjeve që bëhen gjatë zbatimit të këtyre praktikave, kjo faturë ka të gjitha potencialet të shkojë në 900 milionë deri në 1 miliard euro mbi shpatullat e shqiptarëve.

Sot, natyrisht çështje dite është sterilizimi dhe koncesioni i sterilizimit që ishte parashikuar t’u kushtonte në 10 vite me kursin e atëhershëm 100 milionë, me të sotmin 80 milionë, në 5 vitet e para për shkak të vjedhjeve ka kushtuar 76 milionë euro.

Autorë kryesorë absolut dhe mbështetësi kryesor i vjedhjes së dytë të shekullit, përkatësisht Ilir Beqaj dhe Edi Rama, janë të paprekshëm dhe mbi ligjin.

Duke vlerësuar çdo akt të zbatimit të ligjit, duke e konsideruar legjitime të gjitha urdhër-arrestet e lëshuara nga gjykata me kërkesë të prokurorisë për aferën, unë uroj që qytetarët shqiptarë të mos pengojnë degëzat që të shohin trungjet. Se kjo do të ishte një katastrofë,” tha Sali Berisha duke shtuar se trungjet e kësaj afere të madhe janë Ilir Beqaj dhe Edi Rama.

“Ilir Beqja ka firmosur hapjen e procedurës së koncesionit 10-vjeçar të sterilizimit dhe ka firmosur renditjen dhe pikëzimin në garën false të koncesionit të emigrantit me një kompani që kishte të punësuar veten dhe një tjetër. Ilir Beqaj ka firmosur kontratën, në të cilën në shkelje flagrante të ligjit, janë lënë të hapur jo vetëm dritaret, por edhe dyert për të vjedhur dhe vjedhur sa më shumë.

Ilir Beqja, i ka dhuruar mikut të tij, ose ka vendosur në emër të tij sipërmarrjen Beqaj-Rrapaj, duke përvetësuar si hajdut, aparaturën më moderne të sterilizimit dhe të gjithë logjistikën e saj. Qeveria me paratë e buxhetit bleu 1.7 milionë euro një aparaturë ultramoderne të sterilizimit. Ajo nuk u vu në përdorim dhe u pa se duheshin dërguar teknikë dhe inxhinierë për specializim.

Ilir Beqja i dhuroi ndërmarrjes së tij aparaturën, lokacionin dhe qindra-mijëra sete kirurgjikale, të lara në flori, e bën pronar të tyre dhe tani u thotë shqiptarëve më paguani mua pesëfishin e kostos për një operacion. Për një set veglash që nevojiteshin për një operacion, çmimet shkonin në stratosferë.
Nëse ti në këtë operacion të thjeshtë, të nevojiteshin tre vegla, do paguaje aty 30 sepse të tillë të sillnin setin.

Setet dhe raporti set-ndërhyrje siç konstaton KLSH, që ka bërë një kontroll shumë serioz në vitin 2022, aty gjen se qëndronin mekanizmat e vjedhjes masive. Kishin përcaktuar klasifikime, dhe tani në përputhje me klasifikimin, bënin abuzimin më të madh.

KLSH, i gjetur përpara kësaj situate kriminale, i kërkon ministrit që ka firmosur kontratën, të rinegociojë kontratën sepse prandaj u dyfishuan pagesat e spitaleve ndaj koncesionarit.

Por ka edhe një anë dramatike në këtë vjedhje. Ilir Beqaj me Ilirin e tij, udhëtuan mbi dhimbje dhe kufoma, se qindra e mijëra të sëmurë nuk u operuan dot, sepse spitalet nuk kishin fonde për të paguar setet kirurgjikale.

Pra, këtu janë arrestuar disa, të gjithë e meritojnë, nuk ka asnjë diskutim, por kryesor në këtë vjedhje të dytë të shekullit është Ilir Beqaj me firmat e tij, është Edi Rama me mbrojtjen e tij.

Nuk kam parë firmë të Edi Ramës, por ka një problem. Lexova aktakuzën, prokurori thotë me të drejtë se ky Rrjepaj ka bërë mashtrim me pasoja të rënda. Po Edi Rama, kryeministër sharlatan, që për t’i dalë zot sipërmarrjes Beqaj-Rrapaj, kalonte nga studio në studio si sharlatan dhe thoshte se janë operuar njerëz me pinca dhe gërshëre më një krah. Ai që ka dy pare mend, nuk mund të dalë kurrë me një pozë të tillë,” tha lideri i opozitës duke konstatuar se drejtësia po vepron me regji, ndërsa i bën thirrje qytetarë të ngrihen për të larguar këtë organizatë kriminale.

“Opozita dhe PD kanë mbajtur qëndrime. Zonja Albana Vokshi, në cilësinë e kryetares së Komisionit të Shëndetësisë, e ka thirrë Beqajn në komision.

Vetë ajo ka dëshmuar në prokurorinë e Tiranës. Vetë ajo në vitin 2019, i ka kërkuar me shkresë Ministrisë së Shëndetësisë, kontratat dhe të dhënat mbi koncesionet.

Cila ka qenë përgjigjia e Manastirliut? Njëherë në një shkresë tha se e ka hetuesia dhe nuk e japim. Dhe kur hetuesia e mbylli paqësisht dhe në mënyrën më të papërgjegjeshme, prokuroria deklaroi se kontrata e sterilizimit është në përputhje me ligjin.

Pas kësaj u kërkuan sërish të dhëna, Manastirliu tha se nuk ua japin se këto janë sekret tregtar. Këto janë të gjitha të publikuara.

Me këtë rast, unë u drejtohem edhe njëherë qytetarëve shqiptarë. Siç e shihni, kjo organizatë kriminale në pushtet ka kryer vjedhjet më të paimagjinueshme ndaj taksave tuaja, të ardhurave tuaja, pronave tuaja. Sepse pronat publike janë pronat e qytetarëve, nuk janë të pushtetarëve.

Cilido që pret se do ketë një hetim, se drejtësia do bëhet jashtë regjisë, mashtron veten.

Kemi të bëjmë me një drejtësi, totalisht me regji. Ndaj dhe duhet të ngrihemi, sepse në dy vjedhjet e shekullit, autorët kryesore të tyre, qëndrojnë të pacenuar. Qëndrojnë të sigurt dhe hedhin kocka apo koka turku në mënyrë që t’u mashtrojnë,” shprehet Kryetari i Partisë Demokratike, Sali Berisha, në konferencën e përjavshme duke përfunduar:

“Ndaj dhe të dashur qytetarë dhe qytetare, asnjë popull nuk do të toleronte afera të tilla, mega-afera të tilla vjedhjeje dhe shpërdorimi.

Është në dorën tonë të rivendosim ligjin, shtetin ligjor duke larguar këtë organizatë kriminale të kryesuar nga Edi Rama.”