Autoriteti i Konkurrencës mban pezull shitjen e Tring, hap procedurë të thelluar

Autoriteti i Konkurrencës ka vendosur fillimin e një procedure të thelluar për të shqyrtuar shitjen e platformës televizive me pagesë Tring.

Në argumentimin vendimit, Komisioni i Konkurrencës është shprehur se shoqëria blerëse, Vertex Holding, nuk ka aktivitet të mëparshëm dhe nuk ka eksperienca të mëhershme në tregun e media audiovizive.

Nisur nga struktura e tregut përkatës, mungesa e një informacioni të plotë për të vlerësuar mundësinë reale të blerësit për të ushtruar aftësitë funksionale dhe për të siguruar vijueshmërinë e aktivitetit ekonomik të shoqërisë target, me qëllim vlerësimin e efekteve të transaksionit mbi konkurrencën në treg, Komisioni i Konkurrencës ka arritur në përfundimin se kërkohet një analizë më të thelluar e ndikimit dhe pasojave në tregun përkatës të produktit.

Sipas parashikimeve të nenit 56 të ligjit “Për mbrojtjen e Konkurrencës”, në rastet kur ka dyshime se potencialisht përqendrimi mund të shfaqë shenja anti-konkurruese, vendoset fillimi i procedurës së thelluar.

Procedura e thelluar në rastet e kontrollit të përqendrimeve, ka të bëjë më kryerjen e analizave më të thelluara ekonomike dhe të efekteve që ky përqendrim sjell në treg. Gjatë kësaj procedure dhe kur ka dyshime apo shfaqen shqetësimi se ky transaksion mund të kufizojë konkurrencën në treg, kërkohet një informacion më i detajuar, përfshirë edhe dokumente të brendshme të vetë ndërmarrjes apo edhe pyetësorë.

Gjithashtu gjatë kësaj faze, analizohen eficiencat e pritshme të pretenduara nga ndërmarrja si pasojë e këtij përqendrimi dhe nëse ka efekte pozitive të këtyre eficiencave tek konsumatorët, të cilat tejkalojnë ato efekte që mendohen se shkelin parimet e konkurrencës, atëherë përqendrimi autorizohet.

Këto eficienca duhet të përmbushin kushtet dhe barra e provës bie mbi ndërmarrjet palë në transaksion për të provuar se këto eficienca janë plotësuar. Sipas parashikimeve të udhëzimit të Autoritetit, “Për vlerësimin e përqendrimeve horizontale”, së pari këto eficienca duhet të jenë të verifikueshme, specifike lidhur me këtë përqendrim dhe eficiencat duhet të sjellin përfitime për konsumatorët.

Mbi këto argumente, Komisioni i Konkurrencës vendosi fillimin e procedurës së thelluar për transaksionin e propozuar të përftimit të kontrollit të shoqërisë Tring TV nga shoqëria Vertex Holding. Raporti i procedurës së thelluar duhet të paraqitet në Komisionin e Konkurrencës brenda datës 29 janar 2026.

Blerësi është zyrtarisht Valon Shala, por kredia garantohet nga Shkëlqim Devolli

Shoqëria që ka njoftuar arritjen e marrëveshjes për blerjen e Tring, Vertex Holding është një kompani e regjistruar rishtaz në Shqipëri, në gusht të këtij viti, me objekt shitblerjen dhe kontrollin e aksioneve. Ortak i vetëm i shoqërisë është shtetasi nga Kosova, Valon Shala.

Valon Shala është drejtor i përgjithshëm dhe përfaqësues ligjor i Artmotion, operator i shërbimit të internetit dhe IPTV në Kosovë.

Vlera e transaksionit të shit-blerjes nuk është bërë publike, por operacioni do të financohet pjesërisht nga një kredi që blerësi do të marrë në Bankën Amerikane të Investimeve.

Sipas marrëveshjes siguruese të kredisë, huamarrës do të jetë kompania blerëse Vertex Holding, bashkëkredimarrës shoqëria Tring TV, ndërsa dorëzanës do të jenë kompanitë Artmotion, Devolli Corporation dhe biznesmeni Shkëlqim Devolli.

Tring është platforma e dytë e shërbimeve audiovizive me pagesë në Shqipëri. Për vitin 2024, Tring raportoi një xhiro në vlerën e 1.52 miliardë lekëve dhe një fitim neto në vlerën e 13.1 milionë lekëve. Aktualisht, Tring është në pronësi të Concord Investment, shoqëri e zotëruar nga Artan, Adrian dhe Genci Dulaku.

Vlera e transaksionit nuk është bërë publike. Në muajin shtator të këtij viti, aksionarët e Tring vendosën rritjen e kapitalit nga 304 milionë lekë në 1.9 miliardë lekë, duke kapitalizuar huatë e dhëna prej tyre për kompaninë.

Duke iu referuar të ardhurave të realizuar në tregun e prodhimit transmetimit dhe shitjes në mënyrë digjitale të produkteve audio dhe video, Autoriteti i Konkurrencës vlerëson se në vitin 2024 Tring zotëronte 31% të tregut në bazë të xhiros, në rënie nga niveli prej 33% i një viti më parë. Ndërkohë, kompania më e madhe, Digitalb, për 2024 zotëronte 69% të tregut, nga 67% një vit më parë./Monitor/