Avioni i Presidentes së Komisionit Evropian humbi sinjalin GPS në Bullgari. Dyshime për ndërhyrje ruse
Avioni i Presidentes së Komisionit Evropian, Ursula von der Leyen, humbi aksesin në sistemet e navigimit GPS ndërsa afrohej për ulje në aeroportin e Plovdivit në Bullgari.
Për pasojë, pilotët u detyruan të ulin avionin manualisht pasditen e djeshme, duke përdorur harta tradicionale në letër, pasi të gjitha sistemet elektronike të navigimit dolën jashtë funksioni.
Sipas tre zyrtarëve të cituar nga Financial Times, incidenti po trajtohet si një akt i mundshëm sabotimi nga Rusia. “E gjithë zona përreth aeroportit humbi sinjalin GPS. Bëhet fjalë për një ndërhyrje të padiskutueshme,” deklaroi njëri prej zyrtarëve.
Avioni qëndroi në ajër duke bërë qarkullime për gati një orë, përpara se piloti të vendoste ta ulte me dorë duke përdorur mjete analoge.
Breaking news: A suspected Russian interference attack targeting the president of the European Commission, Ursula von der Leyen, disabled GPS navigation services at a Bulgarian airport and forced the commission president’s plane to land using paper maps. https://t.co/FguqRHYCTY pic.twitter.com/d2FBcdnu9R
— Financial Times (@FT) September 1, 2025
Dyshohet se ndërprerja e sinjalit mund të jetë shkaktuar nga “jamming” (bllokim i sinjalit) ose “spoofing” (manipulim i sinjalit), që çoi në neutralizimin e plotë të sistemeve satelitore të navigimit në atë zonë.
Ky incident lidhet me valën në rritje të ndërhyrjeve në sistemet GPS, një praktikë që në të kaluarën përdorej për qëllime ushtarake ose për mbrojtje institucionale, por që sot shfaqet gjithnjë e më shumë si një mjet destabilizimi.
Qeveritë evropiane kanë shprehur shqetësime serioze për këto ndërhyrje, të cilat i atribuohen gjithnjë e më shumë Rusisë, duke paralajmëruar për rrezik real ndaj sigurisë së aviacionit.
Von der Leyen po udhëtonte nga Varshava drejt Plovdivit për të takuar kryeministrin bullgar, Rosen Zhelyazkov, dhe për të vizituar një fabrikë të industrisë së mbrojtjes. Gjatë vizitës së saj, ajo deklaroi: “Presidenti rus Vladimir Putin nuk ka ndryshuar dhe nuk do të ndryshojë. Ai është një grabitqar. Mund të frenohet vetëm përmes një force të fuqishme parandaluese.”
Presidentja e KE, Von der Leyen u largua nga Bullgaria me të njëjtin avion. Incidenti ka shkaktuar shqetësim serioz në Bruksel, duke thelluar frikën për intensifikimin e aktivitetit rus në tokën evropiane, në një kohë kur Moska përpiqet të minojë kohezionin e BE-së përmes formave të reja të sulmeve hibride.
Ndryshe, Bullgaria është një nga furnizuesit kryesorë evropianë të ndihmës ushtarake për Ukrainën, fillimisht duke dërguar pajisje të epokës sovjetike dhe më pas duke ofruar artileri dhe produkte mbrojtëse të prodhimit vendas.
