Avioni luftarak rrëzohet mbi një godinë banimi, Rusi: 13 të vdekur!

Të paktën 13 persona kanë vdekur pas rrëzimit të një avioni luftarak rus mbi një godinë banimi në qytezën jugore të Rusisë, Jeisk, janë shprehur zyrtarët.

Dy pilotët e aeroplanit Su-34, raporton RFE, kanë dalë jashtë tij, para se avioni të godiste pallatin dhe të shkaktonte një zjarr të madh.

Ministria ruse për Emergjenca tha se tre fëmijë janë në mesin e viktimave.

Zyrtarët kanë sqaruar se 68 persona janë shpëtuar nga zjarri në godinën nëntëkatëshe.

“Sipas raportimeve nga pilotët, arsyeja e rrëzimit ka qenë zjarri në një prej pajisjeve të avionit gjatë uljes në tokë,” tha Ministria ruse e Mbrojtjes.

Në disa pamje janë parë banorët lokalë duke tentuar t’i ndihmojnë njërit prej pilotëve, i cili shihet i shtrirë në tokë, me një parashutë mbrapa tij.

Qyteza Jeisk gjendet afër zonës së luftës në lindje të Ukrainës dhe qytetit të shkatërruar të Mariupolit.

Kremlini ka urdhëruar autoritetet kombëtare dhe rajonale për të ofruar gjithë ndihmën e nevojshme për viktimat, raporton RFE. Komiteti Hulumtues i Rusisë tha se ka hapur hetime penale dhe se hetuesit janë dërguar në skenën e sulmit.