Avioni më i shpejtë se stuhia, rekord i ri në linjën New York-Londër

Kompania ajrore British Airways ka vendos rekord të ri në transportin ajror të pasagjerëve me shpejtësi prej 1.327 km/h në linjën New York-Londër.

Avioni i pasagjerëve “Boeing 747-436” ka fluturuar mbi Oqeanin Atlantik, mbrëmjen e së shtunës duke e gdhirë e diela, ndërsa Britania e Madhe është në pritje të stuhisë “Ciara”, më të fuqishmes në shtatë vitet e fundit.

Sipas të dhënave të “Flightradar”, avioni është nisur nga Aeroporti ndërkombëtar “John F. Kennedy” dhe ka mbërritur në “Heathrow” për vetëm 4 orë e 56 minuta.

Kjo është për një minutë më pak se sa fluturimi i kompanisë “Virgin Atlantic”. Avioni i kësaj kompanie “Airbus A350” ka mbërritur në aeroport vetëm për disa çaste më vonë.

Fluturimet e “British Airways” dhe “Virgin Atlantic” ka thyer rekordin të cilin e mbante kompania norvegjeze. Në janar të vitit 2018 nga Aeroporti “John F. Kennedy” i New Yorkut ka arritur deri tek Aeroporti “Gatwick” në Londër, për 5 orë e 13 minuta. Udhëtimi nga Londra në New York, kohëzgjatjen mesatare e ka 6 orë e 50 minuta.