“Avokatët e drogës”, debati Bardhi-Çuçi për çëshjten “Xibraka”

Duke reaguar ndaj menaxhimit të drejtueses së seancës plenare, Kryetari i Grupit Parlamentar të Partisë Demokratike, Gazment Bardhi, akuzoi Ermonela Felajn se po shkel Rregulloren e Parlamentit dhe se do të duhej të ishte futur në rend dite mocioni me debat për trafikun e drogës, duke u ndalur te hetimet për Xibrakën.

“Duhet të lejosh minutazhin deputetëve. Secili deputet e menaxhon vetë fjalën. Në shkelje të plotë të rregullores së Kuvendit anashkaluat një çështje që është shqyrtuar në Konferencën e Kryetarëve, në kundërshtim me rregulloren keni vendosur që mos ta sillni në seancë plenare. Do të duhet të respektoni atë dispozitë që aplikuat në konferencë.

Grupi parlamentar ka paraqitur kërkesë me debat sa i takon prodhimit dhe shitjes së lëndëve të trafikut të drogës në vendin tonë. Ne kemi sjellë shembullin e bashkëpunimit të Olsi Ramës për rastin e Xibrakës. Ju keni vendosur që të bëheni palë dhe ta mbroni, të bëheni avokatë të Olsi Ramës. Ju nuk e keni sjell këtë mocion në Kuvend. Nuk mund të mbyllni këtë rast se nuk është mbyllur hetimi për Xibrakën,” tha Bardhi duke akuzuar mazhorancën që nuk e solli kërkesën për Mocion me Debat lidhur me këtë çështje.

“Në kundërshtim me rregulloren, ju nuk keni sjell sot në kuvend kërkesë për  Mocion me Debat për çështjen e drogës. Në tentativë për të mbrojtur vëllain e kryeministrit, ju keni grisur Kushtetutën. Ju jeni kthyer në avokatë të drogës. Meqë nuk mbyllni dot procedimin ndaj vëllait të kryeministrit kërkoni të mbyllni seancën.” 

Përgjigja e Kryetarit të Grupit Parlamentar të Partisë Socialiste, Blendi Çuçi, ishte shumë më e paimagjinueshme se sa mund ta mendonin edhe konsumatorët e produktit të Xibrakës, duke e konsideruar këtë çështje të ezauruar.

“Ne nuk pranuam as rendin e ditën për ta diskutuar këtë çështje sepse është e ezauruar gjerësisht nga drejtësia dhe Kuvendi. Në kërkesën e grupit duken qartë referencat që nga grupi Habilaj që është hetuar dhe marrë vendime nga drejtësia italian, për të vijuar me Xibrakën për të cilën ka një vendim i formës së prerë,” tha Çuçi duke përfunduar:

“Për këto çështje është bërë edhe një debat për këto çështje, madje kemi pasur edhe një komision hetimor. Për ne nuk ekziston më kjo çështje.”