“Avokati i Popullit”, Berisha: Dëshmi se monizmi përmbyset vetëm me revolucion!

Kryetari i Partisë Demokratike, Sali Berisha, sot konferencën e përjavshme e filloi me votimin e turpshëm në orët e para të ditës së sotme në Parlament ku viti u mbyll në mënyrën më moniste, duke e lënë vendin pa Avokatin e Popullit ndërsa sqaroi pse Ardian Dvorani nuk mbeti pa u zgjedhur anëtar i Gjykatës i Kushtetuese pse e kundërshtoi opozita!

“Parlamenti e mbylli vitin në mënyrën më moniste. Të gjitha pushtet, përveç kryetarit të Bashkisë së Shkodrës, tani i shkojnë qeverisë.

Të gjithë kandidaturat që ishin në listë për t’u votuar, gjykoj se kjo ishte lista më dinjitoze që është paraqitur ndonjëherë, aty kishte përfaqësues të të përndjekurve politikë, si Besim Ndregjoni, i cili gëzonte mbështetje të gjerë të shtresës së tij dhe një kandidaturë e përkushtuar ditë dhe natë për të drejtat e njeriut ishte dhe veprimtari i shoqërisë civile, Altin Goxhaj. Ishin edhe juristë të njohur, të rinj, përfaqëues të gjeneratës së re si Dorian Gjokmarkaj dhe Ilir Dervishi.

Pra, ishin një numër i konsiderueshëm dhe të gjithë ata u hodhën poshtë vetëm pse Edi Rama nuk pranonte asnjërin prej tyre, përveç atij që donte vetë. Ajo që patë në këtë proces, ishte, do të thosha procesi më i turpshëm, me të cilin Edi Rama haptas kërkoi të pushtojë të vetmin institucion që ai nuk e kontrollon.

Në traditë, të këtij vendi dhe vendeve të tjera, është respektuar parimi i Avokatit të Popullit të emëruar nga opozita,” tha Sali Berisha duke vlerësuar se ky akt është dëshmi tjetër se monizmi përmbyset vetëm me revolucion:

“Të gjithë ata që patën iluzion, se u fol për marrëveshje, Edi Rama përdori të njëjtën skemë si në rastin e zgjedhjes së presidentit.

Bëri sikur po ia linte opozitës dhe në fakt u tall dhe nxori lakminë e tij të pafundme për pushtet dhe emëroi njeriun që deshi.

Ky akt është dëshmi tjetër se monizmi përmbyset vetëm me revolucion,” tha Kryetari i Partisë Demokratike në konferencën e tij të përjavshme për të vazhduar me procesin e votimit i cili u zhvillua edhe për anëtarin e Gjykatës Kushtetuese.

“Ardian Dvorani nuk mbeti pa u zgjedhur pse e kundërshtoi opozita. Por siç e parë ju, Dvoranin e votuan vetëm 18 deputetë mos gaboj. 14 nga PS.

Ardian Dvoranin do e bëjmë çështje, ai është simbol i korrupsionit dhe turp për drejtësinë.

Por ju garantoj se edhe Vali Bizhgën po ta çonin në parlament, Edi Rama do e rrëzonte sepse ai tani sheh spiun në çdo person.

E ka kapur spiuno-fobia dhe nuk ka asnjë shkak tjetër përveç spiuno-fobisë së Edi Ramës që Dvorani të merrte gjithsej 14 vota.

Ky doli i poshtëruar, me 14 vota. Unë nuk kam sentimente me të. Por fakti që ai u fut i pari, me shpresën që është bërë një marrëveshje me Bashën, që do votohej Dvorani, dhe Dvorani nga deputetët e Ramës merr 14 vota, dëshmon se Rama është i sëmurë rëndë nga spiuno-fobia,” tha lideri i opozitës duke paralajmëruar viktimën e radhës, Vali Bizhgën.

“Merr Helidon Bendon. I mbyll dyert në mënyrën më antiligjore, më antikushtetuese. Kreu i Shërbimit Informativ emërohet nga presidenti.

Ky e çoi vetë në shkollë, tani që është kthyer, e lë sikur nuk ka qenë ndonjëherë në shërbim.

Ky është i sëmurë rëndë nga spiuno-fobia,” Berisha duke mos ju shmangur dhe ngjarjes së djeshme që trondtiti opinionin shqiptar, vizitën e Kryeministrit të Greqisë, Mitsotakis.

“Së pari, kryeministri i Greqisë, i një vendi partner, mik, mund të vizitojë çdo zonë të Shqipërisë, qoftë si zyrtar, qoftë si qytetar privat.

Këtu duhet të jemi të çliruar nga çdo kompleks.

Mund të vizitojë Himarën dhe çdo zonë tjetër.

Por, zhurma se Himara është minoritet është absurditeti më i madh historik.

Askush më shumë se himariotët nuk janë larim në gjak për identitetin e tyre kombëtar shqiptar.
Himara ka një realitet të pamohueshëm, se një pjesë e fshatrave flasin edhe shqip edhe greqisht. Qyteti, si çdo port, është i miksuar, shqiptarë kryesisht, por edhe grekë, venecianë.

Por këto, as gjuha, as mikstura, nuk e bëjnë Himarën gjë tjetër përveçse bastion i shqiptarizmës.
Himara, e njohur në histori, së bashku me malësitë e Alpeve dhe Sulin, kanë pasur kodet dhe kanunet e tyre,” tha kryedemokratik në konferencën e përjavshme duke shtuar:

“Patrikana duhet të shpallë një ndjesë publike ndaj himariotëve se në fakt, në periudhën kur ata qëndronin ndaj Portës, patrikana flirtonte edhe në kurriz të tyre. Gjë që i detyroi ata t’i drejtohen Vatikanit dhe të bëjnë një modifikim në besimin e tyre, të mbeten ortodoksë të afërt me ritin katolik.

Pra, në këtë kontekst, kryeministri i Greqisë mund të vizitojë çdo zonë, por Himara me të gjithë historinë dhe dokumentet e saj është shqiptare, përfshi edhe ato fshatra që janë bilingualë. Flasin edhe shqip, edhe greqisht.”

Java kishte një ngjarje tjetër shumë të rëndë dhe të shëmtuar, tha Kryetari i Partisë Demokratike duke konstauar se Edi Rama dhe Erion Veliaj, në kundërshtim me vendimin e Kushtetueses dhe çdo parim, varrosën dosjen e teatrit, aktin më të shëmtuar dhe më antikombëtar që ka njohur vendi vitet e fundit.

“Nuk është këtu sfida ndaj një grupi ndaj Aleancës për Mbrojtjen e Teatrit, që janë në vlerësimin tim, qytetarë më kurajozë, artistë më besnikë ndaj krijimit të tyre, profesionit të tyre, por edhe ndaj rendit kushtetues të vendit.

Akti i Ramës dhe Veliajt ishte një varrosje e kushtetutshmërisë së vendit.

Në këtë kontekst, ishte një grusht për çdo qytetar shqiptar.

Unë u them atyre: se ai ndërtim nuk do pranohet kurrë dhe se përballja me regjimin do ketë një objektiv tjetër madhor, rivendosjen e Kushtetutës dhe rindërtimin e teatrit siç ka qenë në vendin ku ishte.
Të gjitha këto dëshmojnë se regjimi ka humbur çdo parim, moral dhe ligj. Revolucioni demokratik është i pashmangshëm. Është jetik për shpëtimin e Shqipërisë,” tha Kryetari i Partisë Demokratike, Sali Berisha, duke u zotuar edhe me këtë rast se Teatri Kombëtar do ndërtohet siç ka qenë, godina e re do rrafshohet.

“Do bëhet gjithçka që ai projekt të mos ndërtohet. Por do rrafshohet. Aty do ndërtohet teatri siç ka qenë.
Kjo nuk ka diskutim. Ai do rrafshohet, do i lëshojë rrugën teatrit siç ka qenë. Do bëhet gjithçka për ta penguar.”