Avokati i Popullit/ PD tërheq mbështetjen, mazhoranca kalon me votat e saj 6 emra

Me 9 vota për dhe 3 kundër, mazhoranca ka kaluar në Komisionin për Çështjet Ligjore dhe Administratën Publike, 6 emrat në garë për kreun e ardhshëm të Avokatit të Popullit.

Pavarërisht se deputetët prezent të opozitës përsëritën se Partia Demokratike ka tërhequr firmat dhe nuk ka ende një emër për Avokat të Popullit, mazhoranca vendosi të kaloj në seancë plenare emrat e atyre kandidatëve që kanë marrë të paktën 28 firma:

-Adriana Kalaja 44 firma
-Aranita Braho 35firma
-Besim Ndregjoni 34 firma
-Endrit Shabani 35 firma
-Skender Haluci 30 firma
-Tartar Bazaj 28 firma

Ndryshe, para votimit, deputeti i PD-së, Sajmir Korreshi tha se aktualisht PD nuk ka kandidatë për Avokatin e Popullit, ndërsa shtoi se lista e parë pasi iu është bërë filtri i parë, nuk iu është dhënë tagri.

“Meqë thoni se nuk kemi marrë informacion, duhet të ishte kishit marrë dhe ju të bënit propozimet tuaja. Mund të keni një mendim tjetër sot. E para ne kemi hequr dorë nga propozimi i kandidatëve. Po deshët hidhini një firmë, dhe vulë nëse keni merak. Edhe me vulë dhe firmë, vët-vët,” tha deputeti i PD-së, Sajmir Korreshi, duke përfunduar:

“Zoti kryetar a do mbani rregull? Ju e keni shkresën, duhet ta relatoni. Ne gjykojmë se nuk duhet të kalojnë emrat e parë, pasi se kanë kaluar barrierat. Nëse bëhet fjalë për firmat që PD ka tërhequr, ky nuk është tagër. Ky parafiltër, ne i kemi tërhequr. Dhe ato që janë marrë para datës për të cilën kemi bërë filtrin e parë, nuk iu është dhënë tagri.”